Merkredi 7 novanm (Dézièm boute)

En parlan d’ diréktrisse, iérossoir mwin la-rève nou té i sanze ankor in coup. Cèt-là té i vé absoliman fiy, garson, i manze ansanm pou vréman. Dessi lo mèm tab pou komansé. La honte lézot té i fé plézir : bann fiy té i poze in demi zou d’ fesse dessi lo boute lo banc, té i tortiye lo rin en ver d’ tèr fou. Bann garson té i vien rouz koman malrouz-kardinal, soman pou la tournir, sanm zot zèl déplimé, zot kolé rakokiyé dann zépol, plito ke d’ rossanm kardinal, té plito parèy ti volaïy la-gaingne la pépi.
E Lina, en plin dann milié ce mouvman-là, Lina trankil, Lina kontan, Lina san-kasse-la-tête, Lina mèm pa fronté. El i pousse Ari si in koté, pou èl gaingne assiz zist vizavi d’ mwin. El i trape mon deux min, lontan, lontan. El i argarde amwin plin zié…

Parlfète, kèl koulèr lo zié Lina ? Pardone amwin, mon Lina, si mwin la-pokor trape ça. La miêne mèm, la poin lontan, mwin té i koné mèm pa !
I prétan dire lo zié rouzon lé blé. Si lé vré pou Lina, sirman lé blé Bassin Blé, blé ofon, blé okré, blé bingn au blé bordaz la mér, blé boul de blé pou fé blan lo kér, fré pou fé fane la fièv.
Soman saspé lé vert ? Vert konm "delo la poin gronouy" zistoir Granmèr i rakonte. Vert tande parèy lo kèr tête salade lé pou pomé, vert gadianm parèy bourzon nouvèl.
Noir, saspé lé noir, noir en grin longani, noir koman la miêne ?
Maron ? Si son zié lé maron ? Maron-là, non té ! Na tro lo zié maron partou !

Vandredi 9 novanm

Lo zié Lina lé maron. Lé maron rar soman : maron klèr parèy pistassié, maron zoli, maron fantézi.
El la-vni soidizan pou koze dan lo trou d’zorèy son frér, mwin la bien rogarde son zié kank zot la-lève dessi mwin : zot lé maron sanm pti zékli lor !

Axel Gauvin