La diréktrisse, depi lo boush-ta-guèl èl la-gaingne sanm son sèf – ossinon sanm lo maire ! – lé oblizé forsé pou vnir batte in pti karé dann réféktoir. El i arète là, i dboute san kozé, i margongne-margongne inpé kank Ivone i di aèl bonzour, i tire in mové coup-d’zié dessi nou, apré ça i arkole semin, i sava.
Soman, zordi – koça i arive aèl ? – èl i amize inpé, i pike in foursète dann morso rougaïy sossisse, épila i rouve la boush gran gran-mèm, en guèl rokin, i artrousse son lèv en kilote déssote-ravine, i amène lo sossisse dessi son dent pou pa la sosse i gome son fard…
Ivone i débarke, tété kinz livr’ devan, palikoune vingt kilo déyér, gro manièr sinkante tone toutotour :
– C’est bon, hein, madame !
Lo dénomé madanm – manmzèl parlfète – i férme la boush en fonnman-volaïy :
– Comme peut l’être un cari-la-misère !
Kari-la-mizèr-là ! Larzan i grêne koman dan son posh-là, don ! pou èl dékriye in bon manzé konm rougaïy sossise-là ?
Pou ashève lo tablo, èl i mètte ankor dsi :
– J’en ai été écoeuré pendant ma jeunesse.

Axel Gauvin