Mwin la-pran in kér, mwin la-karèsse Lina. Lina la-karèsse amwin. In karéssé po sanblan, tèlman vré, tèlman bon. Soman, boudikonte, i arète rienk in gou lo fièl dann mon boush.

Nout deux èl té i assize nout plasse. Lina té i tienbo son zorèy parèy èl i fé toultan. Mi anprofite son zié i büte dessi mwin, pou mwin trape mon zorèy amwin, plito pou frole mon zorèy dousman. Soman mon zorèy lé aèl. Son zorèy aèl mèm mi frole konmsa dousman, mi karèsse konmsa. De loin.
In coup mèm na assé pou k Lina i konpran mon jèst’. Jèst-là i fé si tèlman plézir aèl, èl i vien rouz en flame de-fé.
Touttsuite pou touttsuite, èl i rande amwin cent fois plus mon karèsse : èl i poze la min dsi son figuir. Mon min i suiv lo mouvman. Aèl éstèr pou karèsse, pou bingne sanm la joie, mon jou, mon fron, mon cou. Lé tèlman bon ! Bondié k ça lé bon ! Mi férme ziska lo zié.

Ankor ton tour pou karesse aèl. Akoz t’i trape pa in kou son tété… Anvôy ali ! Fé !
Kèl fé ! Ouça toué va trouve kouraz pou fé. Soman, rienk mazine ça, defé i pran dan ton figuir. Ton trépé d’ sang i monte à la tête…
Oté Soubaya, si la pa tété, lo bra alorse… Zépol !
Mi déssande la min dan mon kou. Aèl – akoz Bondié, akoz ? – èl i plonze son deux zié dan son zassiète pou èl fé sanblan plote son manzé sanm son foursète. Astèr èl i arlève la tête, i argarde amwin, épila – mon kèr i singn rienk armajine ça – èl i fé sanblan éssuiye son lèvr’ sanm la mie dpain. Apréla èl i abandone amwin définitivman.

Axel Gauvin