Abandone out révasman, Soubaya ! I fé plus mal aou ke d’ot shoz. I fé tèlman mal aou ! I rale aou dann dézéspoir pou rien. Lina ossi, daoir, lé pou koule dan la tristèsse… Zisteman, alak lo ran lékol-dé-fiy i débarke. Alapak Lina i débarke, soman èl lé pou (1) rire ! Sanm Adèl Ponpon anplus ! Lina na lo kèr pou rire ! El i galize aèl sanm in manmzèl Ponpon pou ashévé ! In Ponpon k’i rode rienk lokazion pou gougnarde amwin, gougnarde anou.
Lina i rire. Son rir-là : zik banbou dan mon kolone vértébral, larguiyon guèpe dan mon l’ame, bouyon-poizon dann mon sang ! Malgré, mi atann lo pti kou-d’zié, lo pti rogar, lo pti jèst lé oblizé k’èl va fé amwin kank èl va passe koté d’mwin.
Kèl jèst, kèl rogar ? El i passe konmsik èl la-pa zamé vi “boug-là”. Somanké èl lé pou kasse dessik dessi mon compte anplus ! Sanm lo Adèl Ponpon !… Kank mi mazine mwin té paré pou abandone toute, mwin té paré pou rédi lo rin devan ninporte-kiça, dézobéir toute, ziska granmér, pou… cèt-là !

Mi rapèle in kozman Granmèr la-di amwin in zour :
– Mon zanfan, kank lhèr va arivé pou ramêne inn fanm la kaz, mi vé pa oir in "zié-blé", ou i antan !
Mwin lavé-pa konpri çak Granmèr té i vé dire. Zordi mi konpran. Trakasse pa, granmèr : ou nora poin d’ "zié-blé". Ou nora mèm poin d’zié maron ! P’amwin pou rale inn la kaz, à komansé par ce lardèr volkan, shové la-brilé-là !
– Kakaka ! Kakaka !
Lo spèsse ti poul rouz i rire mèm, là !
Rire aou ! Rire ! Mon dos lé larz !… E mon ventr’ lé plin kan-mèm mwin la-pokor manze rien ditou. Epi largue amwin ! Mi foulkan !
Mi lève si tèlman sibite, mi mank kapote la tab tréto. Mwin lé tèlman lansé, la pa loin mi kapote lo pla Mano i tienbo deux min. Lé pa loin ossi mi savir lo Zilbèr k’i sorte ranpli son gamok delo déor kanal. Pa-sito mi passe par la porte, mi büte dsi la diréktrisse :
– Eh, dites ! Où allez-vous, vous là !

Allez-vous, ton-manman ! Déor, déor ! Mi ariv déor ! Gran mérsi Bondié, mwin lé déor !

Axel Gauvin

(1) El lé pou : èl lé apré, èl lé antrin d’.