(La diréktrisse la-kriye apré Soubaya, akoz li la-trape in morso sossisse èk lœ doigt. Soubaya i di son kolèr, son fièrté manje èk "la min")

Anou, rényoné-zindien, de tou-temps nou la-manze konm ça-là. Kèl souyon, kèl malprope néna là-dan ?
« Manger à la main, manger à la main » ou i di ? Dabor inn, nou manze pa "à la main", nou manze sanm lo doigt, lo boute mèm lo doigt.
La kaz granmér, si ou la-sali 2 falanz, i baïye apré ou. Si ou la-sali toute lo doigt, lève aou à la vol, alé lavé, apré ça éspère à-soir pou fé arète out ventr’ trankil – en atandan mètte in galé dessi out faimval. Si in mti dégou la sosse la-vole dessi la pome de min, papa la-fine déza dégrafe sintiron, parsk lé sûr granmèr – lo fron frizé, la boush en kolèr – touttsuite pou touttsuite :
– Vadivel ! Komank i dresse zanfan koméla, don ! Ziska lo droi déréspèkte amwin, ou i done cèt-là !
Çak i prétan dire n’i manze sanm la min, çak i di ça lé sal, zot la pokor vü lo doigt fin granmér, garni sanm son bann bag en or, pou prépare, èk son dérnié falanz, lo pti boulète do-riz lo pouce va amêne droite ziska dan la boush.
Kant’ aou, zoli manmzèl diréktrisse – vié ravodri plito – kroire pa out krash va sali amwin ! Kan-mèm rienk mouye amwin ! Out kozman i glisse dessi mwin parèy de-leau dessi fèy sonz.

Kan-k mi lève la tète, mi voi Lina lé pou vèye amwin. I dévire pa son zié, en kontrèr : i sourire sanm mwin. In sourir inpé trist’. Mé-soman èl i kasse son tristèsse, èl i trouve in gayardiz : èl i fé sanblan d’ trape in pti boute la mie d’pain, épila, pti doigt o-sièl, èl cé pa d’ éponze son lèvr’ ansanm ! Mon tour pou sourir. El i éponze son zou, son nez, son fron. Amwin atèr po rire ! Aèl : séryé konm préfé ! Soman dann son rol, son koude i trouve pa moiyen branne son zassiète ! Lo modi zassiète cé pa d’ déboule dan la pante suifé la tab ! Lo sossisse-la-piré i koule dann son robe, lo zassiète en tol i fé la klosh dessi parpin lo rosh piké. Ala la diréktrisse – lo fémèl-rokin ! – i débarke à la voltij !

Axel Gauvin