Nou la-trouve in contr’-poizon pou lo manzé la diréktrisse : piman.
Ki-soi pome-de-tèr ke la kraze rienk sanm in pti guine de-lé, ki-soi zariko en lame ke la-tranpe sinpleman dann de-leau bouyante, kissoi la viande bouyi – çak lé krü, cèt-là, non : i gaingne pa anparé ! – toute lo fade lo manzé la diréktrisse-là, grace piman, toute ça i aksépe désande dan nout ventr’.

Mi farse, oté , mi malparle. Soman, parlfète, mwin na poin d’ kritik pou fé dessi manzé la diréktrisse-là. Son didine lé bon. Apark na poin d’sèl. Apark la poin zépisse. Apark léguime lé krü, san ça rienk bouyi. Apark la viande i pisse lo sang… Apark, pétète ossi, n’i voi pi la koulèr de-riz. E, kan-mèm son pain – tabouré k’ lé bon son pain-là ! – nout ventr’ i moude à vide. Akoz, san riz-là, la panse, mèm plin, i kriye volér. San riz, lo ventr’ i chante in maloya kalbasse vide k’i batte tanbour dan la tête…

Lo temps Ivone sanm la métresse lé pou éponze zot lèvr’, 3 bokal piman i tourne dann réféktoir, i fé la ronde moun en moun. 3 bokal piman kardinal, zoli piman-la-pâte garni sanm zoli pti morso sitron, sanm pti zik zinzanm. 3 bokal konsékan, néna assé pou poike la lèvr’, brile la lang, konsome la tripe bann manzèr d’ manzé plate k’i ranpe dessi la tér, toute ce bann ke la boush lé tande, ke la lang lé frazil, toute ce bann ke néna gozié-là-krème-béssamèl-là !

Rante lo 3 bokal na inn lé amwin. Kan-mèm mon piman lé pa la komine, bien sir mi done lézot inpé. Soman atansion ! Mi prétan pa i mètte foursète-la-bav dan mon piman ! In manshe kiyèr prope : oui ; in kouto ke la pa gonme sanm la sosse : plüs méyèr ankor.

Axel Gauvin