La diréktrisse la-souke amwin, jist kank mwin té apré trape "à la main" – "à la main, vous rendez-vous compte !" – in pti morso sossisse.
Toute çak fanm-là la-trouve pou mètte dessi mon compte krédi : issi d’ laba, walali, walala !

Çak lé drol sanm diréktrisse-là : èl kapabe gome aou rienk sanm kozman prope : "goulu", "glouton", "arriéré", "tardigrade" ! Kank èl i kroire k’ou i konpran pa, èl i done aou lo raspaïy, lo "mode d’emploi" si zot i préfère, sanm lo médikaman – lo mové kozman sanm son lésplikassion. Konm ça i rouvèr inpé, en mèm temps, out léspri en fransé. Ek rienk in kou-d’ galé mèm, èl i vé tié sept blèsse katorz :
– Tu ne sais pas ce qu’est un tardigrade ? Eh bien, c’est une bête comme toi, attardée comme toi, et en plus paresseuse ! Tu vois comme ce nom te va bien !
Anvôye aou manmzèl ! La p’assé ! Mètte ankor ! Mon dos lé larz : mwin na poin zépol larozoir. Fé mal amwin si ou i gaingne ! Soman kite amwin di aou – kan-mèm mi koze rienk dan mon kèr pou linstan – sar pa tou les zour la fète sinoi po ou. Pa tou les zour in katakrèz konm ou-là va oblize Soubaya bèsse la tête !
Mi anfou d’ou, mi sanfou d’ toute lo bann kozman ou i fé abôye déyèr mwin, mi sirfou d’out "souk-ali-médor".

Axel Gauvin