Sépa kiça toudinkou la-trouve moiyin d’ di :
– Azot ossi, dokteur la-boure son doigt dan les grène ?
Dèk i koze lo grène, Mano i rode pou kassiète, i rakokiye, i manze pi, i fé sanblan manzé, i gaingne mèm pi fé sanblan. Li la për ke lézot i remazine ke ali, Mano, li na poin. Li na për i gougnarde ali konm i fé dabitide, i apèle ali “koupé”, i apèle ali “kokate”… In shanse, zordi, li passe par maïy.
– Lo doigt dan les zèf ? Ou i dmande si la-fé ! Rémon i arvire. La di : ”Toussez, toussez !”.
Epila lo Rémon – son deux doigt anfonsé dann in paire d’grène plüs haut k’ li – i éssèye trouve inpé la toux : “hohonme, hohonme”.
Titone i rire, i dmande :
– Sépa ouça lu boure son doi sanm bann fiy, hin ?
– Daoir ouça k ou i koné-là !
– Pa vré, oté !

Si li la fé ça Lina !…

Mi mazine in coup Lina, Lina pris sanm in doktèr konm ça-là ! Lina au creux dan la dépitassion. Lina, mon pti Lina, pou plère toute lo larme son corps.
– Vien, Lina. Vien sanm mwin. Poze out tête dessi mon zépol. Kite out tète kante [1] dan mon cou. Kite amwin karèsse out min dousman, karèsse aou tande, tande mèm.
Mi anbrasse lo joue kodindé Lina, mi anbrasse toute son kodène inn apré l’ot – zot i pé kroir amwin : néna ! Rienk Bondié i koné la kantité néna ! Mi karesse son zorèy, déyèr son zorèy. Mi karesse son shové rouz.
El i serre dessi mwin, èl i colle aèl èk mwin, épila toudinkou, èl i arfoule amwin : èl na onte. Mi vé kost’ sanm èl, mi vé vnir plüs pré. Dan son dépitassion, èl i vé pa, èl i vé pi :
– Mi gaingne arpi zamé argarde aou zié dann zié, èl i di dan son gro pléré.

Axel Gauvin