In mirak ! Zordi néna kari volaïy pou manzé ! Mi adore ça. Soman Lina mwin la-antrevi talèr-là, la-pokor arivé. Sirman èl i atande son tour pou le vizite médikal. Mi manze arpa tan k’èl lé pa là.
Ari non plüs lé pa là. Akoz ?
Dézorde dann kantine-là ! Zassiète i kongne ansanm ! Kouto-foursète i roule atèr ! Lo verre i manke kassé ! Epila toute ce bann valal-là [1] pou largue la voix, pou lashe lo rir ! In délüj dézorde pou d’vré, ti frèr !
Di pa cé t’in dézorde oblizé. Di pa lé konm ça mèm toultan. Lé konm ça, apark zordi lé miltiplié sink fois, dix fois. Lé ogomanté ossi par rapor lo mouvman d’ vizite médikal, par rapor lo manzé zamé vi.
Kozman i arète pa kroizé. Kozman dessi lo manzé d’ zordi, kozman dessi vizite médikal ! Zamé vü in repa konm ça-là dan nout kantine ! Zamé vü in doktèr issi-en-haut-là ! Dabor inn, apark Zilbér-Tonbe-Kriz – pa sür ankor – na poin pérsone dann kantine-là la-fine voir in doktèr en vré pou vréman…

Titone i dmande :
– Azot-là, zot la-gaingne soufl’ dann son tüyo ?
Rémon i arvire :
– Akoz, don ! Nou lé faïy koman, nou don !
– Dokteur la-peuz dessu mon ventr’, la-di konm ça : "En vala inn qui a de la réserve".
Dann ce péi demoun mizér-là, lé mèg en zarète la mori-là, i fo Titone lé fièr pou son grèsse. Li porte son gro korporanse-là konm Louis XIV té i défile dan son kostime-la-parade.
Ziska Zozèf – pou in coup li la-vni lékol – i fé in mirak sanm lo manzé :
– Té ! Lé bon, té !
Rémon, fièr konm Rataplan, i arvire :
– Ça akoz zéléksion i arive ça. Pou ça mèm lo maire i fé done anou bon manjé konm ça-là.

Rémon lé kontan lo soidizan tiktak lo maire. In tiktak daoir lé mèm pa vré inn tiork.

Axel Gauvin