Déssèr ! Déssèr ankor ! Tanmié déssèr ! Bonbon, anplüs ! Briosse ! Korné-là-kréme ! Shemin-d’fer ! Ti paté !… Titone i pran son lélan pou li vole dessi bonbon-là. Mi kasse son lélan, nèt :
– Dousman mounoir ! La vot’ fine ipotéké !
Mi trape lo pti paté ke Titone té i part poze sink dessi : mon kamarade goudal-goulipia i ramasse dousman son min. Son boush ossi i ramasse, son figuir i fèrme. Mi trape lo ti paté mi done Ari. La boush Ari i rire tou-sèl ! Li anvale son deux gato-là san prann réspirasssion ziska ! Rémon-li, Zozèf-li… sakêne i pran la siêne : lo bonbon i sava en vitèsse. Dann pla i arète rienk lé miêne : in zoli semin-d’fèr sanm dessik rouz dessi. Mi kite ça éksepré dann pla, jist devan lo nez Titone pou k’ li rale bien lodër, pou fé fèr son boush de-lo tanpirkipé. De-lo amér.
Mi mazine :
“ Bave atoué, mon véra ! Bave atoué ! Zire mèm la manman Soubaya si ou i vé… provik ou i di pa in mo.”
Mi oi lo larme i komanse monté dann zié Titone. Mi bouze pa. Rienk kank la dig i sar kassé, kank son pléré i sar dévidé, i sar noiye demoun, la mèm :
– Alé ! Boure aou !
Lo boug i vole dessi bonbon-là ! Mwin néna ziska regré : lé roz en bon-kèr ti semin-d’fér-là !… ça davoir lé bon… Oté ti krév arpa pou ça !
Mi di dann mon kèr :
“ Ou cé t’in tro bon boug, Soubaya !
– Kèl bon boug ! Tire in bon boug sanm aou-là, koça i rèst’, oté ! Ou té tro kontan amontr’ lo Titone ke bëf i komande pa la korde !

Axel Gauvin