(Granmèr, po èl gougnarde soubaya, i rakonte ali lo zistoir son granpèr kan – pti jène-jan – té i vé marié)

« Po marié i fo tire papié, papié la méri. Out granpèr i vole kariol-bourik son papa. I fonse Sinte-Roz (lo promié tas la kaz li té i voi depi anlèr dessi son piton). Poin d’ méri Sinte-Roz !
Li koure Sin-Benoi : vingt kilomète anplüs, lé pa pou fé pèr in tégor tégoré (1). Li fé galope bourik-là mèm !
Li arive Sin-Benoi, li rode la méri, trouve la méri, trouve lo lanploiyé k’i fo.
Lo boug i aksèpt’ fouye dann son gro livr’ – lo Krishna té i koné pa son laz, son date néssanse. Fouyé, fouyé, fouyé dsi fouyé. Dann livr Vint-é-in an, poin d’ Krishna. Dann cèt Vingt-dé : inn tior. Lo livr’ Diss-nëf lé vide ossi… Li lavé katorz-an-édmi !
Ou i koné koça lanploiyé la-fé ? Li la-trape in kate sou, in gro-zak : in piesse la-pi koméla, té ron sanm in trou dann milié. La-di mon bononme :
– Alé mounoir ! Hin ! Alé ashète in pti zouzoute pou ou, sépa inn toupi, sépa kanète, sansa sikrodorz, in mti kéttsoz i konvien aou bien touléka, épila vien pi rode amwin avan sept-uit an !

El i pète à rir, la vièy ! E amwin la brèz i fé bouye mon zou.
– Pou ça-là, ou la-fé kriye amwin Granmèr ?
– Pou ça mèm, rienk pou ça mèm, pou fé rire inpé out boush, soman, ondiré ou lé pa tro anvi d’ rire zordi ! Parlfète, ou noré pa bezoin d’in moné ? I fé lontan mwin la-pa kado aou in mti katsou.
A ! Lina ! Mi di p’aou kèl raz la-monte dsi mwin. Oblizé soman manze raz-là ! Lo mortifié mwin té ddan !

Axel Gauvin

(1) Un amoureux enamouré.