Mwin la-oubliye dire azot in nafèr : depi ièr Lina la-kasse larmoir : èl i tire in robe nèv — en mousline roz — parèy l’ot vié robe mèm. Daoir in famiy aèl la-anprofite in ristourne kanne pou marié in coup. E son monmon la-anprofite èl té oblizé — rézonabe, rézonabe ! — pou èl fé fèr in robe nèv pou son gran mti fiy. Son rézonabe la-sirman pa tro gate son kontanttman, akoz si ou i koupe in lèz dann ba la robe kortèz out promié fiy, robe kortèz-là i tonbe robe lékol mèm, non ? Epila dan la lèz anplüs i gaingne tire in pti zipe zist inpé tro kourte pou lo pti sër.

Lo fér-valoir la robe nèv Lina i kriye komank son vié linz té dégréné.
Komank, dawoir, bann’a-là lé mizèr son kaz, don !
Mizér, ça la-bezoin dmandé. Souvandéfoi, sirman, la faim i doit manze azot par en-d’dan. Lé pa pou ça Lina i tioutioute (1) lo manzé kank néna konm zordi la kantine : èl i pran son temps, èl i doussine (2) son zoli manièr, i lèv pa ti doigt, soman prèské ! Ou-ça i sorte alorse ce bann gro-gro fasson goudaf-tiatia (3) son frèr ?
Li komanse fé nérv amwin, cét i apèle Ari-là ! In mal véra pou bingn dann son leau sâle ! Lé vré k’ son deux mois d’vakanse li la-passe ça pou konblaze son ventr’ sanm fig (4) : fig mir pou gouté gran matin, kari baba fig lo onz’hér, fig-vér-de-sèl-piman lo katr’hér, fig kui dan la peau tazantan rante-rante. Fig gabou, miyone, zinzli, fig malgasse é konsor. Banann karé, fig ron…
Dan la kantine-là, Ari i boure son manjé, parèy i boure kanar la-mètte au grin. Kank mi mazine ça lo frèr Lina, Lina i i yème ça, i songne ça kaziman parèy baba tann !

Pou oblize ali mètte inpé laryaz dessi son lapéti, mi arète pi d’ prèshe ali la moral ! Soman aforse alé à leau… Mi komanse nérvé, mi pike ali sanm kozman plizanpli dür : de-leau dessi fèy sonz ! Boudikonte mi larg :
– Manze pa konmsa ! D’in néstan ou va fé plèr Lina !
Li besse son foursète, li arète mashé — la boush plin. Li tourne la tête pou argarde in coup son sër. Larme i monte dann son zié ! La boush i trévire dsi lo koté ! E li komanse pa file son bav-de-riz atèr !
– Plèr pa, oté ! Plèr pa ! Mwin la-di ça pou farsé : Lina i voi mèm pa aou. Manzé pito !

Démié mille fois li manje en koshon plitok oir ali pléré konmsa-là !

Axel Gauvin

(1) Tioutiou, in ot nom po lo koshon. I tioutioute : i manje konm in koshon.
(2) doussine : in zouti menuizié po fé mëb èk zoli moulür.
(3) Goudaf, goudal, goulipia : gourman, vorasse. Tiatia : vilin manièr.
(4) Fig : banane (cf kari baba fig).