Bayalina, par Axel Gauvin… in roman dann la lang kréol rényoné, an fèyton dann Témoignages -75-

Samdi 5 déssanm (Dézièm boute)

25 zwin, sanm Axel Gauvin

(Soubaya la-tonbe malade)

« Ou la-révasse deux zour plin, out papa la-di aou, apré. Ou té i rire sinpleman… rire, rire, rire… Ka ka ka… Ka ka ka… Ou i pé pa konète koman k’ ça té i trakasse amwin !
– Ou té i préfère mi plère ?
– Fransh vérité, ça oui ! Mwin té i kroire mon garson la-vni fou. Pa rien k’ ça…
– Koça ankor ?
– Out granpér, malade, pliské malade – dessi son li d’ mor – té pou rakonte inn ce bann kouyonade li navé labitide rakonté-là. In léspèsse zistoir li la-invanté, in nafèr konm Sin-Zozèf, en langouti, lo soir Noèl ! Inn bétiz alorse… Epila, out granpèr i pète à rir ! Trouve pa moiyin pète lof (1) dan son rir ! Sibite konmsa… Mor ! Mon papa, mor ! Mor dann son rir ! Ou i mazine astèr si mwin té trakassé kank ou té i fini pi d’ rire !

La fièv pokor fané, doulèr dann ventr’ astér. Apréça la fièv i arpran posséssion. Apréça sépa koça ankor…
Zordi toué lé guéri, inpé faïy-faïy soman. Sança, granmatin gayar, lo soir zist bon pou ramasse en paké d’ boi. Malgré, té i fo absoliman ou té i vien lékol : ou té i gaingne pi sanpasse de èl.
Lina ossi lé mèg. Mèg konm in shate maron… konm in zésklav parti maron. Kan-mèm ça, èl i sourire sanm mwin. El i farse ziska : èl i éssuiye, pou sanblan, son lèvr’ sanm la mie d’pain, depain k’i done pi nou pou manzé-là ! El i rire la joie, é amwin, amwin ossi mwin lé éré.

L’hèr èl i lève pou artourne son lékol, mi romark lo ba son vié robe mousline roz la fine déssote la pome son zenou : èl l’anprofite mwin té malade pou èl pran la pousse parèy bourzon nouvèl kank solèy i done apré siklone. Malgré èl la-mégri, mwin lé sîr son deux tété… Oté Soubaya ou na rienk la koshonsté mèm dann out tête-là, don !

(1) Pète lof : mor (mourir).

Axel Gauvin

Padport

Signaler un contenu

Inn modékri, inn ti lavi, inn komantèr ?