Lo gayar kari zomar ! Lo zomar fantézi !… lo salté d’ zomar ! Konbien d’ temps ça la-kloute amwin dessi lo lit, la-abate amwin, la-fé arète amwin tou-sël, la kaz.
Tou-sël mèm, malgré gramoun té là. Tou-sël : mwin navé pi moyin voir Lina. Amwin, mwin té pi kapabe bouzé, épi aèl, kèl manièr èl noré fé, kèl kari sou driz èl noré roulé, pou èl gaingne vni rande amwin vizite ? Ou i di san oir Lina, soman èl la-pa kite aou inn minite. Toultan, toultan là mèm. Ek ou. Dan ou…

Dabor inn èl i bate karé dann out tête, i promène trankilman, i assize inpé, i alonze in ninstan. Apréla, i re-adboute. Pou gaingne inpé l’air, èl i karte out sil pou èl sorte déor… L’air ! La limièr ! Èl i danse in mti séga dessi out fron. Deux bra karté pou pa tonbe atèr, èl i tienbo lékilibe dessi out nez. I assize dessi la-zèl out nez.… El i sent bon, békali ! Lé pa ce bann léssanse i trouve dann boutèy-là, ce bann “parfum” dan la zol flakon ! El i sent sanbon lib, lash, larg. Lib, lib mèm. El i sent lalêne ti-trèf roz k’èl la-marshe dessi, èl i sent lanisse ke la-balèy son zanm, èl i sent romarin la savane…
El i avanse ziska out boush k’ ou i antrobaïye viteman pou kite aèl rerante dan ou. Ou i kalkil èl va karèsse out lèvr’ en passan. Aléoir ! El i préfère zoué la marèl dessi out dent. Ou i férme la boush plus vite possibe, pou tashe moiyin trape, srèss inn son pié, parsk ou lé sîr astér, èl va shapé, i fo èl i shape sanm ou ! Soman èl la-fine déboule dann out kolé : ou i gobe rienk la briz k’èl la fé…
Astèr èl i ranpe dessi out léstoma. El i glisse dann komansman la plime out kélkèl1… I fo ça i digdigue aou : i fo ou i pète à rire.

Axel Gauvin