– Nou na faim, bèze-out-manman !
La voix Guèl-Roz i éklate dann gran réféktoir-là. Manmzèl-diréktrisse, bien sür, cé-d’ lève en guèpe :
– Qui a vociféré cette insanité ? A ! Le courageux anonyme ! L’enfant de Caïn ! Et pourquoi pas le coup de poignard dans le dos, maintenant !
El la pokor fine son guélé, Ivone i vole dessi Guèl-Roz :
– C’est lui, mademoiselle ! C’est lui : je lui ai vu !
– Alors, c’est toi, gros porc ! Si t’as quelque chose à dire, tu le dis en face.
Toulmoun té i kroire Guèl-Roz té i sar kaponé, aléoir : li trouve in kèr – èk 2 kozman fransé makote :
– Madame, nous a faim !
– Nous a faim ! Nous a faim ! Mais mangez donc, Bon Dieu !
– Madame, lé pa bon !
– C’est pas bon ! En tous cas, c’est bien meilleur que tous vos caris, vos rouguails… Ça n’est pas bon ? Eh bien, vous n’aurez rien d’autre. Et si vous n’êtes pas contents, vous savez ce qui vous reste à faire.
El i fé in gran tour d’ bra pou amontre anou la porte.

– Totoche out manman, don !
Guèl-Roz la-largue son zirman en plin dan la guèl Manmzèl-diréktrisse. Mi koné pa si èl la-konpri lœ kozman – sürman, in-foi èl i di èl lé rényoné… Toutefasson, si èl la pa sézi lœ parol, la mizik, i fo èl i konpran. E èl la konpri pou vréman. La prèv : èl la-trape lœ pov marmaïy par la touf shové, la-fé danse ali, oui !
– Huit jours d’exclusion ! Vous verrez si ma cuisine n’est pas bonne et si l’on peut m’injurier ! Il n’y a pas d’autre amateur ?
Bononme zimaz lé pa plüs trankil ke nou.

Axel Gauvin