Amwin (soman pou in mérl blan mi avoué arpa ça pérsone) mi trouve pa aèl si tan tèlman vilin k’ ça. En kontrèr… ou noré pi mazine èl noré — forséman : la sër ari ! Éskiz Ari ! — in gro tète zak en fouké, in patte-là-klosse ! Aléoir ! Toute lé normal konm k’i fo mèm. La patte lé konm k’i fo. La tête lé grossèr k’i fo. Shové lé bien pégné. Lœ zié i flanme. Lœ dent i fé pa ralé-poussé (la-poin inn i kile kank lézot i avanse), lé alinié toute égal mèm. Épila in si tèlman zoli sourir, épila lœ bra si tèlman lézé, lœ kor si tèlman zoli manièr bouzé… Andiré, andiré… in pti malbarèz.

Guèl-roz i pérde pa lokazion pou li anime Ari. Li sorte son plasse :
– Oté Gro-tète, out seur po mwin. Mwin mèm lœ pro, dakor ?
Ari, ziska l’hér la pa di rien, konmsik toute lœ conte bann’a té i shante té i konsèrne pa ali. Li té i rouvèr son boush rienk pou anval son manzé. Soman, de oir sinpleman lœ Guèl-Roz débarké, ça i mètte ali en shalér. Azizé lœ 2 kozman lœ boug i vien d’ di-là ! Zamal Ari i monte :
– Dakor, li arvire. Mwin va kite po ou cète na katr’ patte-douz-tété, la keu-en-tirbouchon.
– Pran ton bouré, Rémon i di.
Rémon lé kontan Guèl-roz i gaingne in boi. Soman lœ Guèl-roz lé pa pou largue ça konm ça-là. Li arvire :
– Lœ douz tété, lœ tirbouchon, mi sanfou d’ ça, provute la-poin la patte-là-kloch.
La kolèr i monte dessi Ari :
– Out manman katr’ patte dan la sann !
Guèl-Roz té i rode rienk ça mèm : li marshe dessi Ari. Son gran min-là, li fine pa déza lévé pou li kalote Ari ! Mi mate in kou devan ça ! Mon 2 poing séré, mi ‘garde ali zié dann zié.
Li la pa si kouyon k ça, lœ boug : touttsuite pou touttsuite li konpran mon mti-poing-noir-lé-pa-tro-tann-là noré 2 pti kozman pou di son gro-guèl-roz-là-pa-tro-dür. Li take son také, li arsava reassize son plasse. Li lé si tan tèlman kami, margongné mèm, li vienbou pi.
Dire mwin té i kroir mwin té fine pardone ali ! Aléoir ! Mwin lé sür, astér, ça noré fé plézir amwin fé lèv détroi zoli-zoli pti boubou dessi son lèv.

Axel Gauvin