Po arvnire azot, la sër Ari l’arni lékol : zot maman la-sorte lopital depi kinz zour, i argaingne rèste tou-sël la kaz astér, i arniabou lave son linz, fé kui son manzé, lé kapabe rœ-okipe par èl mèm lœ réstan son valal.
Son sër i arvien, épi ça Ari sé-d ’ sanz plasse pou li vire aèl son dos !
– Ou i yènme pa out sër ? mi dmande.
Lo marmaïy i arkokiye koman tronpe-là-mor (sansitiv).
– Akoz mi yènme arpa aèl !
– El i fé pa për aou nonpli ?
– Akoz èl va fèr peur amwin, don !
– Sépa, mwin… Akoz, somanké èl lé riskabe rakonte out kaz ou i fé lœ kouyon lékol. Konm ce zafèr ou i mètte out pié dann zassiète manzé-là…
Ari i arkokiye ankor plüs. Boudikonte li margongne :
– El i di pa rien manman, èl-là.
Alorse, Ari, akoz ou i vire aèl lœ do ? Ou noré onte in zoli sër konm ça-là ? San-ça ou noré onte de ou, onte lœ goulipia ou lé pou fé toultan ?

Toudinkou : defé dann kann, volër dann park volaïy :
– “Messieu, Messieu” i arive !
Lo boug, ke bann’a i apèle “Messieu”, ke bann’a i vole dessi pou alé di bonzour, pou antouré, cé t’in boug apépré laz gramoun Vévèl, mon papa – karante an à monté. Cé t’in vré litone mèm, apark li néna 2 léspartiate dann pié. Rémon i anonse amwin li mèm lœ mari la diréktrisse ! Mé ouça diréktrisse-là la-parti rode in yab pou marié ansanm !
– La glasse ! La glasse ! “Messieu” l’amêne la glasse pou nou !
E lé vré lœ boug l’amêne in gran barre glasson deleau ke li la-angarote dann in gran gouni pou pa k’i fonde tro vitman. Rémon i di konmsa : toultan lœ boug na in pti kado pou li fé marmaïy lékol : sépa glasson, sépa létshi, sépa fig migone… Astér, ala lœ boug lé pou kasse – gran-gran kou-d’marto dsi ! – son barre glasson pou li distribié morso par morso toute çak i vé dan la kantine. E toute i vé. Akoz pa amwin ossi dann tas ?

Axel Gauvin