Lo kado Titone i fé anou zordi, st’in bèl zak. Bèl ! Anfin, pa-si-tan, soman – kan-mèm la di – kinz kilo amonté. Ouça Titone la-parti tire ça ? Li l’anfonsse in foursh k’i ansérve dabitüde pou soulaz pié fig kank rézime lé tro lour, li la-anfonse in foursh dann déyèr lo zak. Li la-pousse ça en montan dessi lo mür, ziskatank mi gaingne trape la ké. Epila li la-pousse en montan, la-poussé, épi amwin, par anlèr, mwin la-ralé, ralé… Boudikonte, lo zak lé là !

Mwin la-poze lo zak dessi in tab-lékol pa tro loin la fénète. Malgré la pante la tab, li glisse pa en rézon d’ toute lo pikpik son peau lé kouvèr ansanm. In kou d’ kouto mèm, mi fande lo zak, mi rouvèr ça konm i rouvèr lo ventr’ koshon la vèy Zourdlan. Touttsuite pou touttsuite, lodër i ranpli gran réféktoir-là. Touttsuite pou touttsuite la kantine i kasse en 2 camp.

I fo mi di azot : la poin pérsone pou arète fré devan zak mir. Na çak i adore à la foli, na çak i détest’ à trape fizi. Néna bann "pou-lo-zak" in koté, bann "konte-zak" l’ot koté, kaziman parèy bann manzèr d’zèf dann livr "Les voyages de Gulliver" mi vien d’ dégaje po fini lire.
Bann "pou-lo-zak" i pran zot kontan dann son sanbon siro vayan. Zot i gaingne in gayar dann son tande en rozé. Zot i toushe paradi sanm son gou la krème vélouré. Détroi gousse zak, i refé azot pou la zourné, pou la semêne, pou lané. Bann "kontr-zak", tanka azot, i di : zak i ragoule demoun avank ou la-fine goute son gou. À zot dire, zak-là i koule dann ventr’ parèy zanguiy en glu. Zot i prétan ziska lodër zak i monte dessi ou konm karapate dessi tété bëf, i suive aou déyèr konm moush palto vert ! Vré pou vréman, lo kèr i arète pa fré devan zak. Vré pou vréman, zak mür i kasse demoun dessi la tèr en 2 camp.
Mazine pa la frontièr i passe par la vorassité : Adèl sanm Mano, 2 goulipia-gran-tripe, lé "pou-lo-zak" ; soman kamarade Soubaya ossi. E mi kroire pa, mwin lé si tèlman vorasse ke ça ! Zilbér-Tonbe-Kriz (plüs gourman na poin) i gaingne pa koste kissoi sanm zak sosso, kissoi sanm zak dir. Ari ! Ari, zak i fé lève son kèr ! In nafér, oui !…

Axel Gauvin