Mano i arnouvèle lo zafèr iér. Li sré bien kontan kontinié gougnarde Ari. Rézman, Zilbèr i prévien ali, parsk zordi mi prétan pi ça :
– Baya i antan aou, spèsse kounan !
Kozman Mano i sèk dann son gozié. Lézot ossi i fé la boush koshon dann marmite pois. Titone i anprofite pou fé son vantar :
– Pa amwin pou pleuré touléka. Sept zasiète buté mwin la-manjé. E navé ankor lo kreu dan mon léstoma ! Si lo salopri d’ Gro Ivone té pa vnu tire amwin, mwin noré rakl’ total-é-kapital, plus ankor si navé !
Alapak li mètte à krié :
– Mon ventr’ na poin le fon ! Mon ventr’ na poin le fon !

Lina lé trist. Somanké pou ièr ? Somanké pou çak Ari la-fé, ièr ?
Saspé Lina i anvé d’ mwin ? Pourtan, mwin la-éssèye trouve toute manièr pou abate la safté (1) son frèr : pa mwin lotèr si, aforstan zot i manze la mizér, lo soir, zot kaz, lo ventr’ Ari la-anvayi lo dedan son tête !
El i lève lo zié dsi mwin. Mi essuye mon lèv en vitesse : lo signal avan nou navé labitide. El i sourire pou mwin in pti sourir blème. Ek in mti jèst’ trist’, èl i amonte amwin tablo :

Vive les vacances
A bas la pénitence
Tous les cahiers au feu
La maîtresse au milieu.

Pou ça mèm, alorse ! Mérsi Bondié ! Mèrsi, mèrsi, mèrsi ! Soman, toute-suite pou toute-suite, mon kèr i sérre, mon deux zié i galfine (2)… I fo mi koze in kou sanm èl avan vakanse. Sof koman koman, i fo mi trouve in fasson pou mwin koze sanm èl ! I fo !

Axel Gauvin

(1) vorassité.
(2) brouyar fin.