Zilbér-Tonbe-Kriz i kassiète déyèr son min pou li done anou in ségré : son manman la-anprofite èl la dsande en ville, pou porte plinte linspéktèr konm dekoi manzé lé pa bon. Linspéktèr ! Sépa si zot i rann azot compte !
Lo Zilbèr dabitide out zié i passe parkanpark si tèlman lé pal, Zilbér, pou in kou, i arsanm in moun. Li lé si tèlman fièr pou ce zistoir linspéktèr-là, son figuir ziska lé moins blèm :
– Zot va oir si i chanje pa. Linspékteur la-promi manman.
Titone – son bav la po filé parèy in véra au fémèl – i dmann :
– Va arnir konm avan ?

Arvien, arvien pa, ça i konsèrne pa amwin ! In sël mazinassion i passe dan mon lidé… i passe pa : i rale amwin konm tourbiyon dann bassin kan la ravine i déssande, konm ra-d’maré la mèr : largue toute, alé ! Largue ce lékol gafourn-là, ce péi lo diabe bouyi-là, ce bann litone-patzone fièr zot koulèr blan férblan, san oubliye lo Lina k’i intéresse pi mwin, ke la pa zamé intéresse amwin.

Axel Gauvin