Vive les vacances ! Vive les vacances !
Ça lé ankor marké dessi tablo.

Vive les vacances ! Vive les vacances !
A mort vakanse ! A mort !
Deux mois san woir Lina !

Astër, dégaz aou vitman Lina ! Dégazé ! Grouyé ! Fé lo vif !
Okilé lo modi ran lékol-dé-fiy ? La-pèrde ??!!
Depi sépa konbien d’ temps, anou garson, nou la-fine arivé, azot, bann fiy… Mon trépé d’ sang i bouiye kank mi mazine, sirman, la métresse lé pou kasse lanbordir en plin dann milié semin, sanm sépa kiça ankor… ! Èl i antien pa pérde lo temps… lézot, lo salté !
Konm lo vié, papa alorse, i di toultan :
– I pèye bann’a gro-gro larzan pou ramasse lo mou. Anou, rale lo dür pou gaingne in mti moné !

Lo vié ! Ankor in ot cèt-là ! Déporte amwin deux mois la kaz granmèr lavé p’assé pou li : té i fo li déssole amwin inn semêne avan ! Mwin la-mèm pa gaingne di Lina lo deux pti kozman mwin té i vé di aèl !
Mi sent mwin va remine vakanse-là lontan ! Longue konm in tour dan lanfèr ! Konm in vie san de-riz ! In tüé-kër, in tüé-kouraz, in tüé-la-joie, in tüé-la-vie !

Ariv aou, Lina ! Vien, té ! Mwin néna tèlman, tèlman bezoin de ou !

Ari la-fine tire in vôyaz manzé pou li, in pla büté koze pa koman. Li atake ça en kabri fermé san manjé. En boush na poin lo frin. En tripe la pante ! Amwin, mwin néna anvi demande ali, poze ali késtion, konète ! Koze de èl sanm in moun i ème aèl.
Pou di lo vré po vréman : mwin lé en deux : lanvi demandé, la onte demandé. Mi demande pa.

La-pérde ce samèr lékol-dé-fiy !

Ala zot-là ! Ala lo ran bann fiy ! Mi deboute toute mon longuèr pou oir si Lina… pou oir Lina ! Lina, oukilé Lina ! Ala èl là ! Mon kër i bate dan mon dos. Rienk de mwin, mwin té fine kriye son nom, mwin té fine koure dsi èl, trape aèl dan mon deux bra, anbrasse aèl devan toute demoun-là – anbrasse aèl pou toulbon ! Soman, kèl bébète i pèze amwin dsi lo banc, i kraze amwin assiz ! Mi assize, mé soman, for koman li vé, la onte i défande arpa mwin guète aèl, i gaingne arpa oblize amwin besse mon tête : mwin va rogarde Lina ! Mi argarde aèl, èl i argarde amwin ! Plin zié ! La klérté i arvien dan mon kër !

Axel Gauvin