Çak mwin té i koné pa, cé k’apré nout partanse, bann’a té i kontinié fé zot goulipia-la-grosse-tripe. Mwin té i koné pa bann Guèl-Roz, Adèl Ponpon, Mano — Mano-san-zëf — té i part ramasse lœ moug, té i sar fé in dézième ventr’ sanm lœ restan dann zassiète lézot. Bann’a i bataïye prèsk pou passe lœ pre, akoz lœ pre mèm i ramasse lœ boute la viande k’in boukar — lé rar, soman i trouve — la-kite dann son zassiète. Pou lœ pre ossi, lœ réstan d’riz en gobe, lœ riz en boul bien prope, bien zoli. Lézot i pran çak i rèste, çak lé gréné, çak lé gomé sanm la sosse. Ankor éré si la pa fine zoué dann riz-là, si la pa fine plote ça en manzé koshon.

Bann Ari, Guèl-Roz, Mano, Adèl é konsor i vole dessi bann réstan-là, i bingne ladan konm pti poul dan la poussiér, i goudal-goulipiate ça tanksétassé. Alé kroire zot la onte ! I fé lœ vantar, oui ! Ari, pou prann in ka, i pétiye en d’dan pou li dire :
– Jordu, mwin la-gaingne 3 zassiète, 3 zassiète buté, 3 piton-n-Nèj kaziman.
Mano lé zalou, i fo li arvire in nafèr :
– Amwin rienk deu ; sorman dœ-riz en boul. Hin ! Pa dœ-riz dégréné, dœ-riz sâle.
Grokèr Ari i monte, là :
– Arète tobusse ! Mwin la-vu aou apré manj lœ restan d’ Gilbèr-Tonbe-Kriz
– Akoz ? Gilbert lé pa dmoun, don ?
– Koman lé pa dmoun ! Demoun mèm ! Sorman i tarde pa vot tour ossi…

Epila Ari, lœ Ari d’ Lina, èk son patte noundi, son bèl tête zak, i fé sanblan tonbe kriz son tour : li largue son corps atèr konm en malkadik. Li débate, li kongne dann tréto, li rédi son barre d’ kolé, li vire son zié d’ lanvér. Apré ça li cé-d’ bave son soidizan maladi dessi parké lœ rosh piké, épila li pète-à-rire konm in vré samèr d’kittsamèr k’ li lé pou vréman.

Axel Gauvin