Bayalina, par Axel Gauvin… in roman dann la lang kréol rényoné, an fèyton dann Témoignages -43-

Vandredi 5 oktob, prœmié morso

9 avril, sanm Axel Gauvin

Si manzé défoi lé pa krü, pou ète plate lé toultan plate : ça la poin pou manké. De-sèl, li koné pa, diréktrisse-là ! Zépisse nonpli ! El i di èl lé rényoné : pa sür ! Touléka, lé rar èl i done anou in bon nafèr konm sardine en boite. Là, na pi rien pou sèke atér. N’i manzré la mok ansanm — si té i sérve anou dan la boite. Soman, bien sür, i tire lœ sardine bien zoli, bien prope, dann in pla, pou done anou. Alorse, n’i frote lœ pla vide-là sanm de-pain ziska tank la-fine prope koman parké salon Granmèr. Kank lodër sardine mèm na pi, Ari sé-d’ foute ankor in kou-d’ lang dann pla vide-là…
Ala çak n’i fé kank manzé lé bon. Malérèzman, dabitüde : “kari” d’ France ! Pa ça pou rale anou. Toute i kaïye an-plasse… Afo ! Pa vré. I pë pa kaïye an-plasse : nou na tro faim ! sirtou bann cète i manze lœ rosh, lœ soir, zot kaz. N’i manze. Pa toute soman. Réstan i arète en piyaz. Pérsone i bataïye pi pou gaingné.
Mano i di Ivone lé kontan toute ça “rogaton” i rèste-là, èl i amêne ça son kaz pou soigne koshon ansanm.
– La viande ? Koça èl i fé sanm morso la viande ?
– Akoz, koshon i yème pa la viande, don !
– Somanké èl i manje èl mèm la viande k’i arète !
– Lé riskabe ankor ! Lé riskabe èl i fini èl mèm mèm toute lœ réstan !
– Zot i oi Ivone, lœ soir, trin d’ « boulouf boulouf » lœ leau sâle pou kochon !… Ivone, otoué kadine !

Lœ kozman lé si tèlman gayar, nout toute cé-d’ pète à rire. Soman démié n’i mètte lœ frin, pangar la diréktrisse i antann anou, san ça tantion Ivone i konpran nou lé pou gougnarde aèl, épila, pa-sito la diréktrisse la-fine kole shemin, lœ Ivone i sougorz inn rantre nou, i foute ali in zoli kokman.
De-pain la diréktrisse, li, li trouve pa zamé lœ temps moizi. Son pain-là lé bon ! I balanse ziska sanm dœ-riz Basmati. Soman, lœ ventr’ demoun, kan-mèm ranpli sanm lœ meyèr pain ke néna dessi la tér, kan-mèm foulé ziska gozié sanm de-pain, si li la-pa gaingne son riz, li lé pou kriye marmite mèm ! Apark de-riz, na poin rien lé kapabe take lœ také bouzaron demoun.

Axel Gauvin

Padport

Signaler un contenu

Inn modékri, inn ti lavi, inn komantèr ?