(Zéléksion i arive : lo maire la-fé done sorbé marmaïy la kantine)

– Lé bon ! Lé bon ! Titone i kriye en gayardiz. Li lishe son doigt, li lishe son min le li la-gome sorbé avèk, li lishe son bra lé gomé ossi. Gran coup-d’lang ziska dessi lo devan son semiz ke zékli la glasse lé pou fonde dessi.
Lé vré k’ lé bon, lo kittsamèr d’ sorbé ! Domaz na rienk çak lé vert : rouj grénadine lé plüs méyër. Lé si tèlman vert k’i fé vni nout lang vert koman fèy zavoka. Mazine zot mèm lo bann grimasse, lo mokaz, ke nou l’apré fé. Mazine lo rir nou lé ddan !… Mon kontanttman i sèk anplasse kank mi oi Lina i manze pa. El la-mèm pa parti trape son sorbé – sréti rienk pou done Ari. Mano nonpli la-pa parti. Koça toute ça la i vé dire ankor ?

I fo la diréktrisse i romark fil goni-là dann son zoli gato mariaz :
– Mais il en reste deux, èl i koze son tou-sël. Il en reste deux, èl i kriye for pou nou toute. Qui n’est pas venu chercher lo sien ? Vite ça va fondre !
Lina, Mano : zorèy kosson dann marmite pois. Mé soman koçak i arive ce bann fan-d’garse-fémèl-lapin pou fé lo makro pou Lina :
– Lina ça madame ! Lina la-pa pri !
Epi l’ot ki-d’son-manman d’ Rémon – sanm son lang vert (« Sorbé vert ! Lu koné la kouleur k’i fo, lo maire ! Vert konm kouleur nout parti ! In boug bandé lo maire-là ! ») – ki-d’son-manman d’ Rémon i dénonse Mano :
– Mano, madame ! Mano mèm i veu pa prann son sorbé.
– Lina, ça, madame !
– Mano !
La diréktrisse i koné son koupabe. El i komanse par Lina :
– Qui est Lina ? Où est cette Lina ?
– Madame, mwin la-fine manj lé miêne.
Gardsoune en sèf – la diréktrisse – i koriz kozman Lina :
– J’ai déjà mangé lo mien. Répète !
– J’ai déjà mangé lé miêne.
– le mien.
– le mien.
– Puisque tu le dis ! Enfin, c’est ton affaire.

Axel Gauvin