Ari la-maïye toute dann son tête, li la-tronpe zour : va fé lopérassion rienk la fin di mois. Avant-iér, kank zot la-parti doktèr en ville, la-tire foto son pié, l’arpasse ça la radio, la-fé détroi gran tré léstilo-a-biy dessi ziska – lo* tré-là i voi ankor dessou la bou ke Ari la-gonme son pié ansanm. Nout joie lé konplé, preske konplé : n’i trouve lopérassion i tarde.

La diréktrisse pa-sito fine arivé, jist pou kasse nout kontanttman, cé-d’ bate dann son deux min.
Koça èl i vé ankor ce spèsse katakrèz -là ?
– Silence ! Silence !
– Silence ! Silence ! Ivone i ardoube pou tashe moiyin fé take lo bèk Adèl Ponpon k’i vé pa arète kozé – kan-mèm son boush lé plin manzé.

La diréktrisse i vien api son koude dessi son biro. El la-pokor komanse kozé, Ivone i vien poze dessi léstrade in gro boite ron :
– Sorbé, Titone i kriye. Sorbé !
– Oui mes enfants, la diréktrisse i di, èk in sourir konm cèt Yvone Horner dessi paké sigarète JOB. Oui, mes enfants, le dessert d’aujourd’hui est cette magnifique surprise que notre maire vous fait, et de l’argent de sa poche en plus !

Epila, èl cé-d’ komanse done, shakène la siêne, lo bann baton-delo-glassé.

Axel Gauvin