(Zéléksion i arive : lo maire la-fé done sorbé marmaïy la kantine. Lina èk Mano la-pa vnü trape la zot. La diréktrisse i vé trape Mano. El i rode ali :)

« Et le Mano ? Où se cache donc l Mano ?… Allez, debout !
Mano i dboute, soman son tête i kante en boudin si lo koté. Pou pa tro fé parle ali, li sé-d’ tire son fransé pou trouve in léskiz :
– Ma dent est piquée, les affaires doux me fait mal.
– J’ai une dente cariée, les choses sucrées me font mal. Répète !
Tan k’ Mano la-pou ardoube lo kadriy, Ivone i vien margongne in nafèr dann trou zorèy Manmzèl la diréktrisse. La boush ça i vire en fonnman kazou :
– Ça va, j’ai compris ! Eh bien nous dégusterons votre sorbet en pensant à votre gugus que Monsieur De Maisonneuve battra dimanche. Tenez, Yvonne ! Celui-là est pour vous.

"Gugus" ? koça i lé ça in "Gugus" la ? Kèl "Gugus" èl la-pou kozé, èl la ?

Avank mwin la-fine poze késtion kamarade, lo ravodri d’ Rémon i réponn :
– lo chef kominist’. Papa-manman Mano-Lina, i amène zéléksion pou bann lo diab, bann kominist’.
Sa i renouvèl amwin pou toulbon li té fine di ça pou papa Lina. Mé soman, "Gugus", "Gugus" pa, mi kasse pa la tête pou ça, mwin ! Mèm si Lina i "gugus", lé pa pou ça mwin va yème aèl moins, srèsse in mti guine.

Lé pa prédikassion ce vié sofé d’diréktrisse-là va fé pérde mon Lina son sourir. Kozman en bob konmsa la, i glisse dessi èl konm delo dessi fèy sonz ! En atandan, Mano l’ot boute nout tab, i arète pa rale lo rime, i margrongne :
– Pa amwin-là pou manze la taïy Maisonneuve !

Axel Gauvin