Momandoné, famiye Gauvin la parti viv Boi d’Nèf Sin-dni. La momon, Claire lété diréctriss lékol, é lo papa Félix plantèr épi konpagnon d’ route Dr Raymond Vergès. La famiye té nonbrèz, siss garsson, inn fiye, la plipar né dann Boi d’Nèf avèk konm saz-fam, in madame l’avé bone min é èl téi apèl, madame Ah-Pane. Axel sizyèm zanfan papa-momon lé né dann Boi d’Nèf… Mé dann lékol-la sak l’avé sé in lékol, mé sirtou l’avé in kantine, éssanssyèl dann in tan la popilassion l’avé pankor gingn sirpass in maladi andémik téi apèl la fain…

Onzèr lété l’èr la kantine, pou in bone santène marmaye, souvan défoi lo sèl vré ropa zot téi pran dann zot zourné. An parmi bann marmaye l’avé sak téi manz normal épi sak téi goulipiate karéman, i pé dir zot téi blade… zot pla, sète lé zot la résté, lo sirpliss, épi lo sirpliss di sirplisssi é sa lété konm in konkour d’manzé pou zot, kaziman prèss in maladi... Astèr, alon vitman rante dann lo roman mi sorte anparl azot Axel la ékrir.

Dann roman ni anparl, l’avé Soubaya, in gran marmaye malbar kinzan par-la, pétète apré prépar son gran sèrfika mé laz lamour té apré toke dsi la porte son kèr an la pèrsonne in tro zoli yabesse téi apèl Lina é pou lo jenn garsson malbar lo tan la kantine té lo tan li téi pé rogarde Lina, an dsou, é Lina, son tour, téi pé rogarde son Soubaya an missouk… L’ané lékol i pass, zour apré zour, inn apré l’ote, konm grin shaplé. Shak zour i amenn kissoi son l’évènman, kissoi in l’évolission dann bann rolassion rante lé z ’inn épi lé zot dann léspass i apèl La Kantine, pétète lo pèrsonaz prinssipal dann roman-la…

La Kantine, son bann pèrsonaz, Soubaya, Lina, Gro Yvone, Bèl tète Zak, toussala pou done in roman formidab, Faims d’enfance, pibliyé dann le Seuil l’ané 1987… La vèrssion an kréol rényoné – Bayalina — v’ariv l’ané 1995 dann zédission lo Grand Océan li ossi in roman a par antyèr. Rode pa in tradikssion ladan, Axel la pa vouli in n’afèr konmsa, in si gran lamouré noute lang, in si fin konéssèr pour sir li téi vé in gran roman an kréol rényoné pou ofèr sa son bann pèrsonaz, épi son bann léktèr dann la lang kréol rényoné

Pa d’porte par Justin biyétist dopi dizuitan dann zoinal « Témoignages »