Non, ti-frér, non : mi manze arpa. Çak i vé manzé, manze ali ! Boure ali ! Pa amwin, srèsse pou goute zot manzé-là ! Mwin la-fine di, ardi, arrépète lœ vié : zot kantine-là, pou in ot ! Pa pou Soubaya ! Démié in bouyon brède la kaz pito k’ toute zot viande, zot poisson, zot déssér ! La-point in grin zot riz va déssote lœ baro mon boush ! Lœ vié, son koko dür, li va garde pou li mèm.

– Ou va arète lékol onz hër, li la-di amwin. Ou va arète lékol. Ou va rantr’ dan la kantine ! Ou va assiz déyèr out zassiète. Epila… ou va kite out ventr’ kriye la faimval si ou i vé ! Soman… di pa i artourne dan mon zorèy, apré, ou la-parti vole kane sanm gouyav pou fé rèste trankil out tripe. Hin !

Lœ koko vié malbar-là lé dür vèye pa ! Soman, mwin lé pa son garson pou rien : compte pa dessi mwin pou manze manzé bann’a ! Mwin va krève la faim si i fo ! Epi, oté, kinz an révolü dessi mon tête, koça ankor zafér lékol-lékol-là ! Koça mi arsanm, amwin-là, gran koman mi lé, dann ce tas d’ pti marmaïy i galope partou konm in bann kabri larg dann karo fatak ? Koça mi arsanm pou vréman si mi arsanm pa in gran malol, gran kokol, gran zingade inpé bète-bète ke manman i tienbo par la min ?

Ankor si bibliotèk-là… Kèl bibliotèk ! Détroi vié livr-la-ravodri i fo kasse in papa kadna pou trapé !… Mèm pa 2 zour mwin narté fine lire toute si la diréktrisse té i anprète amwin. Soman, ouça la-parti kassiète ankor, ce diréktrisse-là ?

Axel Gauvin

La pankor fini...