Bayalina, par Axel Gauvin… in roman dann la lang kréol rényoné, an fèyton dann Témoignages -2-

Lindi 3 septanb (Kontinüassion, dézièm morso)

4 zanvié, sanm Axel Gauvin

Dan mon vizavi, na in bèl tête zak lé pou manzé. I manze pa : i blade ! I blade pa : i boure ! I fo oir ali pou goulipiate son manzé-là ! In koshon ! In tioutiou ! In kadine ! In kadine la-pa gaingne son leau-sâle depi 8 zour ! Lœ riz : en-d’dan ! Lœ gropoi : en-d’dan ! Dœriz ankor, ankor gropoi ! Rienk la viande li toushe pa : li kite ça pou en dérnié. Li fé linvèrse bann zanfan rish. Zanfan rish-là, zot i manze la viande en promié, zot. Bien sür : zot i koné nora la kantité ; po ragoulé si i fo ! Zot i atake la viande-là, tifrér ! I vole là dsi… Apark kank zot i fé zot « mwin la-pa faim », zot « mi yème pa ça » ! Zot boukar alorse… Mwin lé à dmandé si, kan-mèm la-di, mi préfére pa manièr gro tête zak-là ? Toute fasson, alé trouve in marmaïy rish tér-là, ou ! Bann çak lé rish-là, bann vaza, zot lé tro kontan kale anba en ville pou zot bien profite… lœ bon l’air…

Lodër i di aou kari-là, ça kari-la-viande-bëf. Mwin la-pa zamé gaingne lokazion santi lodër la viande bëf, soman mi koné na ce lodër-là. Si lé pa sa, koça i lé, alorsse ! La viande bëf, la-poin pérsone, la kaz, pou manze ali. Nout rolizion i défande absoliman.

Papa, oté ! narté gaingne mal dann kér, si li té i koné i done anou la viande bëf pou manzé. « Si li té i koné… » ? Mé akoz li konète arpa ? E li va konète ! A-soir mèm pou komansé. Afér mwin v’atann demin pou di ali ? Na voir si li oblize amwin alé manze la viande bëf dann kantine-là !

A ! La viande bëf-là !… Done amwin in mèrl blan, mi manze pa ali. La sosse kari bëf nonpli. Kan-mèm dœriz sossé sinpleman… Kan-mèm zot dœriz lé pa sossé nonpli, parlfète. Ninportékèl zafér dan mon zassiète — dan mon zassiète, tèrla-là, dan ce kantine-là — lève bone-hër pou fé manze amwin.

Axel Gauvin

Padport

Signaler un contenu

Inn modékri, inn ti lavi, inn komantèr ?