Sanm in dent mon fourshète, mi lève en réspé in morso la viande ke lœ gro pipe-léo-kantinièr la-trouve moiyin foute poze dessi mon pla san dmande amwin rien. Mi di "en réspé", mé soman mi koné mèm pa si mi lève la viande bëf-là en délikatèsse, en réspé konm k’i doi, san ça èk la-për. Mi koné bien bëf-là, ça lé sakré, soman lé si tantèlman défandü d’ manzé, mwin lé à dmandé, kank ou i tonbe devan in kari viande bëf-là, si pa la për plito i monte dessi ou.

– Oté, malbar ! V’i manje pa ?
Tête-Zak i voi li mème Mwin la-pa toushe manzé-là. Li koné anou zindien n’i manze pa ninportékèl viande
Mi lève in coup la tête po oir kèl trikmardaz la-pou zoué loukassiète dann son gro koko la-poin la noi, la mème poin deleau-là…
Lé pa Tête-Zak i vien d’ kozé, là. In gro guël roz la-sorte éksprésséman déyér l’ot tab laba, la-trouve moiyin vnir largue ce kozman-là.

Guèl-Roz i tienbo séré dann son bra gosh, dessi son vié pülo krouté d’ salté, son pla li la-mèm pokor fine manzé. Son min droite, li la-fine déza poze dessi mon zassiète. Tête-Zak, à la vol, i fé parèy son koté. A-ya-yaïy ! Bèzman dan la kour Patèl ! Lékèl rantr’ lé 2 va kite son kamarade-goulapia pran mon manzé pou li ? Pa Guèl-Roz ! Pa Tête-Zak ! Anon parié zot 2 i sar vire pojak inn é l’ot, i sar dresse lé kote son kamarade. La guér, la guèr dan la kantine !… Po koça ? Pou 2 pti morso la viande… La viande bëf ankor !
Amwin ? Grin d’ bibasse 3 kilo dan mon 2 zorèy, malol katr’ livr dan mon zié ! Mi antan pa rien, mi voi pa rien. Pa amwin-là pou boure mon kiyèr sale dann ce marmite k’i bouiye pa pou mwin !

Axel Gauvin