– Oté, malbar, out manjé po mwin !
Mi réponde pa. Lé pa sanm mwin Guèl-Roz i koze, là. Pou komansé lé pa in késtion li la-pozé nonpli ; lé pa in demande li la-fait. Ça in kozman konm ça mèm mèm, in gargouyaz patate sho. Ça i konsèrne pa amwin. Mi réponde pa. Dabor inn, manzé-la lé pa amwin, kantine-la pa mon kaz !
Guèl-Roz — mème pokor fine manze son sardine ! — i azoute ankor anplüs, sirman pou li anime Tête-Zak :
– V’i antan ça, Gro-Tète ? Lœ pla malbar po mwin.
Là, li pète in spèsse rir makote, in rir gomé sanm la sosse sardine, ankor bérné sirman sanm la sosse lœ kari bëf ke li la-manze ièr. In bèl rir gra, tiatia vèye pa koman.
La réponse Tête-Zak ? In pléré ! Tête-Zak cé-d’ larg in gro pléré !

Tête-Zak i plère ! Mwin té i mazine lavé-pwin rien pou éspasse dann gro kalbasse Tête-Zak-la ! Poitan néna in tourbiyon de-leau la-pou fé tourbiyon dan son gro tête-là, néna in bourade-lo-vent la-pou siklone la-dan. Lœ vent la-onte — la onte akoz li la-kapone devan zèrgo lœ kok guèl roz ? La dépitassion ? La zalouzri, po ardoublaz manzé li la-pa gaingné-la ? La zalouzri, ça lé kapab fé plère in tête zak, ça ?

Axel Gauvin