Zordi Guèl-Roz la-vni assiz vizavi d’ mwin.
Iér, li la-bate lœ mayi Tête-Zak, li la-rinsse lœ Tête-Zak, la-matapane marmaïy-là ! Pov Tête-Zak ! Lœ 2 mastapin li la-pran dan son koko d’ tète, la-fé kaïye ali en plasse. Yér, kouraz pou kouri li la-mèm pa trouvé ! Zordi, anplüs, Guèl-Roz i vole son plasse !
Daoir Guèl-Roz i vien vizavi d’ mwin pou li fé son matador, son grozabo. Sirman pou li alonze sinpleman lœ bra po li trape mon manzé. Ali-ossi, li koné rienk anvalé, bouré, goulipiaté. Gro gazon dœriz, zariko pür, bèlbèl morso kari, toute ça-là, tèlman la për dan son boush, la për son dent, i galope en vitèsse dan fon son gozié, i déboule dan son panse — parèy volaïy si tèlman la-për lauto… i koure dessou la rou !
Mwin lé à dmandé koman Guèl-Roz i fé po li dijère toute ça-là. Kança li trouve lœ temps sirtou ! Lé pa lœ pti somèy kourte li rale dessi son livr léktür-là, na assé pou fé passe son dézéné ! Anplus, lœ soir katr’ hër, pa-sito la métresse la-fine largue anou, alapak li sar vole gouyav pou li bladé !

Méni zordi : la sosse sardine. Sardine en boite. I vo pa sardine fré, mé rien. Lodër i lève ! I rale !… Pardon ! Eskize ! Rale, rale pa : mèm taux ! Fait faire de-leau mon boush, fait faire pa, lé parèy. Fait gargüiye mon ventr’, fait pa…
Compte pa dessi mwin pou largué ! Papa i gaingne ankor assé larzan dann son mortèz, pou li fé mètte dœriz au feu pou mwin. Lé pa pou mon dèrnié lané lékol, mwin va komanse manze dann zassiète la-lave sépa koman ; en plin dann milié in bann goulipia i vien lékol rienk pou manze manzé la kantine, rienk pou fé arète zot bouzaron trankil !
Si manman t’ankor là, zamé èl noré pa kite fait faire ça. Dabor inn, nou narté pa dann in gafourne-lo-diabe-bouyi konm issi-en-haut-là, konm bann’a i di. E amwin, mwin narté pa konm in shien dann larozoir, in mouçamièl dan la colle jak.

Axel Gauvin