(Guèl-roz, in marmaïy rassist’, la-déréspèkte Soubaya. Dabor-inn Soubaya néna la onte, apréla la kolèr i monte dann son kër).

Souvandéfoi, avan la raj la-fine pran posséssion dessi mwin, lœ boug la-zir amwin-la, la-sali nout rasse, boug-la la-fine kol somin trankilman ! Mon kér, kan-mèm lé plin sanm lœ fièl, i fini par tonbé. Mèm si, apré, mi artrouve lœ salté i titoiye anou, mi kite ali pou la valér !
Dabitide, konm ça mèm mèm lafér i éspasse. Soman, zordi, Guèl-Roz lé là, tèr-là la mèm. Devan mwin. Alonz lœ bra na assé pou done ali ! Anplus, i rir, i gougnarde, i blade son manzé ! Rir ali, farse ali, blade ali ! Amwin, mon min i sère sanm la raj dessi lœ manshe in kiyiér té i dor dessi la tab… lœ guèl roz cé-d ’ avanse la min po li trape mon zassiète…
Lo coup la-shape tou-sèl !
Non, Soubaya, non va : la-pa shape tou-sèl.

Aou la-akonpagne ça sanm toute out forse, sanm toute out kolér. Akoz Ou i di : “akonpagne” ? Lé pa aou, pa aou mèm mèm, la-pike ali ? Pa aou Soubaya Caroupoulé, figuir noir, min noir, bra noir, partou noir, pa aou mèm mèm, spès malabar, spesse manzér massalé ! Pa aou mèm, spesse koupér kolé kabri ! Paou mèm sanm out Bondié na tro lœ bra-la, lé pa aou la-pike manshe kiyièr-la dann son min ! Èk toute out forse ! Aou ? Non !
Oui ou la-fé, oui ou i rœgrète pa, oui jamé ou i rœgrète arpa !
Epila, guèl ali tan k li vé, lœ zanfan d’ pitin !