– Manjé malbar po mwin ! (Guèl-Roz i poze son mark bone-hër, zordi)… En parlan d’ malbar, na inn i sar mourir asteur. Tèrla la mèm, ankor !
Epila Guèl-roz cé-d’ dœboute dessi lœ ban. Epila, devan toute demoun-la, li vire son déyér pou mwin, li boure son doigt dann fonnman la raie son pti kilote :
– La, térla konmsa, na in malbar i sar krévé !
Li fé sanblan santi son doigt. Li fé la grimasse :
– I pu ! I pu massalé ! I pu malbar !
Fé zot mèm in lidé komank la-rire dann kantine-la ! Amwin, lœ sang i shofe dan mon figuir, i fé brile mon zou noir. La onte — ce spès salté, ce ravodri la onte-la ! — la onte, i monte dessi mwin, i arkouve amwin, i toufe amwin. Epila, dousman dousman, mon kolèr i lève, i grandi, i arfoule dan mon tréfon ce salopri la onte-la !

Dabitide, mon kolér i monte pa ti-lanpe-ti-lanpe, parèy la mér po li vni plène. Mon kolér i pran — pa konm dœfé dann tron d’ boi — koman dœfé dann léssansse lauto. Mon kolér i lève arpa talèr, si néna in talèr : i pète a-l’hër-a-la-minite ! Kroi amwin, lé pa pou sanblan : kassé-brizé. Mwin mèm i vien fou ansanm. Lé pi in kolér : st’in tanguène, st’in fangouni ! Dann in raj konm ça-là, mwin lé riskab fé ninportékèl kouillonade ; mwin lé kapabe kassé, défonsé, déshouné. Déshoune amwin mèm en promié si i fo.

Axel Gauvin