De mon plasse, dann lanbrazir la porte, mi gaingne oir lœ dézième batiman lékol : moitié klasse bann préparatoir, moitié la kaz la direktrisse.
I di la maladi la-atak diréktrisse-là. I di èl lé pou vnir infirme. I di konmsa si lé pa in mirak, èl i gaingne arpi zamé fé lékol. La fénète son shanm lé toultan férmé, také par en-d’dan sirman.
Par lœ sël fénète réféktoir, lœ gran bra mèg in pié zak i sèk en plasse. Pié zak-là i mor pa son bone mor : si ou i argarde par dann fon, ou i oi la-plishe ça au moins inn bone min larzèr toutotour, pou fé krève ali.
– Ça travaïy Gramoun Flavonien, ça.
– Gramoun Flavonien ?
– Lœ propriétèr bann kann ou i voi là. Li rode tié la borne, pou fé manze par son karo kann, ti-dousman-ti-dousman, lœ tour la kour lékol.
Déyèr lœ zossaïy lœ pov pié zak au mouroir, lœ kann i fé linossan, i balanse trankilman son flèr dann pti kouran la briz. Lœ kriminèl ! Li atann rienk l’hèr pou li trangl’ la kour lékol-là, sirtouk la-poin rien, srèss in vié métalik ! Pou garantir ça.

Axel Gauvin