Na poin in salle ékspré pou la kantine : n’i manze dan la klasse la diréktrisse lékol-dé-garson. Nout lékol, parlfète. Kank i arive l’hër d’ manzé, bann shipèk lékol-dé-fiy i vien ogomante nout ran.

Nout métresse i prétan k’ dann temps lontan, l’avé poin lékol issi-là tèr-là. L’avé sinpleman in gran kaz gro blan propriétèr. In gran kaz sanm volaïy, mouton, bourik, shœval… toute ! In gran kaz-varang, lékiri, baskour… Temps-là, la salle n’i manze en-d’dan lété rienk in gran magazin. I prétan dire. La métresse i di.
Si té rienk pou balle mayi anpare la plui, afèr, alorse, lœ mür épé in mètr-là ? Afèr lœ bann poto bèl konm lœ mât bato lontan ? Afèr zarboutan (ke) mon 2 bra i gaingne mèm pa fé lœ tour, là ? Afèr sirtou in batiman hotèr konm ça-là ? Pou toushe lœ fétaz, oté ! I fo mètte pié dessi tête, au moins 3 boug mon longuèr ! E mwin lé pa si pti k’ ça, pourtan. En kontrér.
In sël porte. In sël fénète ! Trouve drol, apré, i fé toultan demi-fénoir dan ça gran sal-là !… Lœ zour la rantré, 2 bononm la-vni bate katr lign bleu en karé dessi lœ mir. Daoir pou pèrse in fénète en plüs. Mé soman rale katr’ trait bleu-là lé plus fassil ke rouvèr in mètr’ gro moilon scélé sanm bon mortié-siman. Lœ 2 bononm, nou la-vü azot rienk in fois mèm. Apré : fini ! En atandan féklèr i aspère son tour déyèr lœ mür en galé.

Axel Gauvin