Soman, zordi, kank Ari i komanse fé son sinéma, Ivone la-fini son manzé. Malgré son gro grossér, malgré son bouzaron tro plin, Ivone i vole dessi nou en mèr guèpe ravazé. Apêne si Ari na lœ temps ramasse son “noundi”.
– Spèsse jako, mwin va fèr éklate ton gro koko plin dleau, mwin !
Min gosh, èl i souke la touf shœvé Ari. Min droite, èl i komansse klak lœ marmaïy. Ari i éssèye anpar lœ coup. I kriye. I débate. Boudikonte li lé oblizé pran son baté-lavé mèm. Ivone i done Ari, èl i done ali, èl i done ali mèm. Klak dessi klak. Dan la tête, dann kou, dann koin zorèy…
Ivone, gro salté, ti oi pa toué lé pou assonme pti marmaye-là !
Kroi aou èl va arété !
– Demoun l’apré manjé, i fo v’i étal vot brinjèl-là-gangrène ! V’i voi pa ça lé dégueulasse ! V’i peu pa konprann ça lé dégueulasse ! V’i konpran pa… san ça v’i fé ékseupré po fèr dégobiye lœ mond ? V’i fé ékseupré. Hin ! Vou lé dégueulasse mèm ! Toute la bann, dan vot fami, lé dégueulasse konm ça-là ! Soman mwin va fèr passe zot dégueulasse, mwin la !
Kank èl i lash Ari, la zanm lœ pov marmaïy i fléshe, i sède. Li tonbe atèr dessi son zenou.
– Tan-k aou malbar ! Instigue alu ankor, ou va voir çak v’i gaingne sanm mwin, vou-là !

Axel Gauvin