– Tansion ! Gro Ivone, oté !
Ivone-là st’in gro pipe-litone-patte-jone i okipe la kantine. La fèsse ça : la fèsse léléfan. Son guèl : la guèl lipopotame. In ot afèr : son guinguin i santi pu transpirassion shofé. Iér, Rémon, en réspé, la di amwin konmça Ivone la métresse lœ maire. Li di Kank i arive zéléksion, èl i rantr’ dan l’ ron kouttpié-kouttpoin pou son zaman. Mi kroi bien k’ Rémon i admire Ivone-là :
– El lé for konm in bëf, oté ! Li di. Lœ bononme èl i poze la min dsi, li oubliye son « Nom du Père ». Lœ « Nom du Père », in prièr anou, koulou ! Epila lœ maire, in boug bandé, lœ maire !
– In kittsonmanman, oui ! Mano i di.

Soman Mano i koze pou son ventr’. Inpé konm si, in koté, li té i gaingne pa kite kozman Rémon-là passe konm ça mèm ; épila, l’ot koté, li vé pa amontr’ demoun çaq li pense. Apark mwin, na poin pérsone la-antandi son kozman…

Ivone i tonbe konm lœ shèf dan la kantine-là, sirtou k’ la diréktrisse lé malade. Ivone mèm i tire lœ manzé, èl mèm i vèye dessi nou… en prinsipe, èl i vèye dessi nou ! Mé kèl vèye dessi nou èl i vèye ! Pou pa pérde son temps, pou pa son dent i trouve l’hèr i amize, pou pa kite son panse kriye la faimval, èl i tire pou son prope compte in zassiète büté deri-zariko. Dessi la tête piton-là èl i vérse 2-3 bon loush kari la viande. Èl i assize au biro. Anou la ! En avan k’i di ! El i goulipiate ossi son koté. I fo Ari sanm Guèl-Roz i colle déyèr èl si zot i vé ratrape aèl. Tan k’ lœ total, lœ kapital, lœ voyaz manzé, la-pa déboule dan son ventr’, tan k’ son pla lé pa prope konm la posh demoun oki, èl i voi pa anou, èl i antan pa anou : n’i pé trankilman fé toute kalité la kouyonade n’i vé, pa aèl pou fé in compte èk nou.

Axel Gauvin