Ari i souplète amwin pou li sanz plasse sanm mwin. Pou koça ? Rémon i done amwin lésplikassion :
« Ari i vé vir lœ dos bann fiy ! »
Vir lœ dos bann fiy ? I fo ète fou, malade, gazé ! Touléka bénèf pou mwin : amwin éstèr pou gaingne louke bann’a. Dan l’tas, somanké na détroi i komansse bon pou manze mayi en grin, oté !…

Soman, akoz Ari i vé vire lœ dos bann fiy ?
Pa bezoin mi demande Rémon pou li souflète dan mon trou d’ zorèy lœ réstan lésplikassion :
« Sa seur l’arnu. Pou ça mèm lu la-demande aou chanj plasse sanm lu. »
Akoz Ari i vé vire lœ dos son sër alorse ?

Mwin té i koné mèm pa, Ari lavé in sër. Rémon, li, li koné toute dessi bann Ari (pou komansé, Rémon i koné toultan toute) :
« Lu néna katr’ seur sanm in frèr. Lœ Bon Dieu la-puni zot toute, parse lœ papa i vote kontr’ la relijion : lœ frèr ossi nana inn patte-la-kloch, épi lardeur volkan la-brule la tête toute sé seur. Argarde in peu lé flanm lanfèr konm i flanm dessu la tête cèt-là ! Lé plu rouj ke zot parti !

La di amwin ‘garde, mi ‘garde (konmsik mwin lavé-bezoin i di amwin !). E mwin lé pa tou-sél pou ‘gardé ! Lézot ossi i louke aèl bien, soman, azot-là, rienk pou tire foutan :
– El na cheveu flanboiyan po vréman, oté !
– La nuite, ça i doi flanke lœ feu dan la payasse mayi, oté !
– Zot la-vu koman la figur ça lé kodindé !
– La pu inn figur, cé t’inn fig mur.
– Daoir èl la-bronze sou moustikér.
– Di moustik la-kaka dessu sa gueul, oui !
Epila toute la bann cé-d ’ ral lœ kèr en foutan :
– A-ya-yaye, la pov fiy ! Akoz ça lé vilin konm ça !

Axel Gauvin