Bayalina, par Axel Gauvin… in roman dann la lang kréol rényoné, an fèyton dann Témoignages -9-

Vandredi 7 séptanb (dézièm morso)

23 zanvié, sanm Axel Gauvin

Dessi nout tab, na poin rienk Ari. Néna, anparmi, in pti kourto shœvé noir. Li di li apèle Rémon. Rémon la-débrouye ali pou li assize koté d’ mwin. Toudinkou, li done amwin in pti coup d’ koude :
– Oté, v’i avèye dessu mwin.
Aha ! Issi ossi bann plüs for i avèy dessi çak lé plüs fèb kontr’ d’ot plüs for !

Mi lèv mon zépol pou anvôy lœ Rémon déboule dan mon col. Mwin lé kontan pourtan : bann’a la-fine klasse amwin dann lékipe brafor. Mé soman, afér, amwin-la, mwin v’ alé bataïye pou in Rémon ?
– Demin mwin va porte deu kane po vou ; deu kann Java dou à-n’pa-dire. Epüla kank sra la sézon, mwin v’ amêne mang Jozé, épila ponplemousse, épila létchi, épila longani.
– Mwin la-pa bezoin kissoi out longani, kissoi out létshi, kissoi out ponplemousse, kissoi out kane, ou i pë garde toute pou ou !

La figuir Rémon i alonze sanm la-dépitassion :
– Lu veu tape amwin. Lu veu tape amwin, akoz, iér, mwin la-rire, kank ou...
– Di ali fé la farse éssèye tape aou !
Samèm lœ Rémon té i vé. Kèr klér, li arkomanse manzé.
Oté, Baya ! Ala komank i pérde ponplemousse, i pérde kane Java, i pérde létshi, i pérde longani !… Akoz ou lé kouyon konmsa, don !
Fé in compte, sanm mon kouyonisse, ou !

Axel Gauvin

Padport

Signaler un contenu

Inn modékri, inn ti lavi, inn komantèr ?