Bann konm Ari-là i détèst’ lœ temps vakanse. Mazine rienk in pti ninstan lœ korvé i fo ou i fé anplus, lœ travaïy out vié i oblize aou fé : dépayaz kane dann divé-la-gratèl, fanaz langré d’sèl i manze lœ doigt. Epila, moi d’aout, la koupe kann dann kèr fourmi gran dent, sharôyaz brassé kann dan la montée i fé pète lœ fièl…

"Viv lékol !", “Viv lékol !”, “Viv lékol !”, “Lékol partou !” Ala çak Ari lé paré pou kriye konmn nérvi dœvan la boutik, dann milié shemin si i fo. "Viv lékol" ! Mèm si – kank la métresse i fé son gran prédikassion, son lamontraz alorse – i arète ali rienk in vié zékli lœ rosh pou, aforse aforse, fouiy in rigol dan la tab. In rigol ! Rienk in rigol mèm. Ari i koné pa ékrire, li konète arpa zamé. Kan-mèm rienk trasse son nom, li gaingne arpa fé !

– V’i manje pa ? Li dmande amwin.
Mi alonze mon pla pou li. Li rœfize nète. Pourtan mi koné son boush i fé d’leau tanpir k’i gaingne. Li di :
– Aou manje, ou ! Talér vou va tonbe en féblèsse.
Lé vré, békali ! Mi sar pa gaingne la maladi pou in vié malbar koko dür. Mi atake. Soman, avan, mi pousse dann zassiète Ari in pti morso rougaïy sossisse. Lœ kontanteman lœ marmaïy ! Lœ sourir li fé amwin ! In bon, vré, gayar sourir. Sanm rienk in pti morso rougaïy sossisse dan la boush !

Axel Gauvin