Guèl-Roz la-préfère shanze tab : li l’artourne son promié plasse. Tanmié ! Tanmié ossi li lé là : mwin té trakassé pou li. Trakassé ? Akoz don ? Son min lé pa plüs gonflé k’in makatia ; lé zist inpé plus mov in zanblon... Mi di ça anfoutan, soman mwin lé kontan pou vréman zordi li la-gaingne vnir lékol. Iérossoir, la kaz, mwin la-passe mon temps mazine, somanké mwin la-kasse lœ zo son min, somanké sépa koça ankor… Li gaingne bouze son doigt : tanmié. Soman guète ali, oté ! Pou fé lœ gro pti-mizér devan son bann kamarade !

Mwin lé kontan, vréman, la min Guèl-Roz na poin gran-shoz : mon kér lé pa magazin-la-kolér, lé pa godon-la-méssansté, lé pa gardmanzé-la-vanzanse. Iér, grankouto mwin noré pike min-la ansanm. Iér, parèy i kloute dessi in boi zoizo bélié dann milié karo mayi, mwin noré kloute ali ! Zordi : rœgré sinsér.
Ti rœgrète ! Kèl rœgrété ti rœgrète ! Twé va rœgrété toué la-korize in léspèsse koshon i méprize demoun ! In ravodri i zire ton nassion ! Alorse, konmsa, malbar i mor dann fonnman la-zamé vü savon, dann bôyo (en parlan par réspé) i koné pa papié, i frékante rienk lœ rosh sanm féy brinzélié ! Oté, rœgré, ça non, toué la-poin ! Dizon, ton kolér la-fane inpé… dizon, ti ranküne pa ali tro… soman, rœgré-la, non… !

Tête-Zak la-vni re-assize vizavi d’ mwin. Li apèle Ari. Ari i manze ankor en goulipia, soman, astér, li pran in temps pou arlève la tête pou sourire sanm mwin. Son sourir lé toultan gonflé sanm in bèl boushé manzé, mé rien : i fo pa demande tro.

Axel Gauvin