Ari la-presk fini manze toute son manzé. Li amontr’ amwin, dann fon son zassiète, lœ morso rougaïy sossisse li la-kite pou la fin :
– Lé bon !
In coup-d’min mèm — coup-d’ poklin plito — Ari cé d ’balèye lœ trépé d’manzé té i rèste dann son pla, li rouvèr la guèl gran koman gran-guèl, li lève la min : en-d’dan, ti-frér !
Epila, pa-sito li la-fine anvale son nafér :
– Mi yème pa vakanse !

Té pa bezoin li di amwin li yème pa vakanse. Na lontan mi koné. Mi koné akoz ossi : po demoun konm bann Ari-la, vakanse na tro lœ gou mayi-sèk-brède-lastron-piman-krazé. Ankor si navé assé pou bien ranpli lœ ventr’ ansanm ! Mé-soman zot lé oblizé alé rode in pti déssér gouyav vert en gravèl pou ranpli lœ ventr’ apré ! Lé oblizé alé pérse de-leau sikré kane pou noiye la faim, pou — srèsse 2 z’hér d’ temps — anpèshe lœ ventr’ kriye lassassin. Dann in gafourne koman ici-en-o-la, vakanse i marshe ventr’ vide, vakanse i rale son kor en golème. Lékol, en kontrér, i amêne vré bon manzé : deri, lœ grin, la viande, tazantan in pti sosse sardine… !
Mi malparle pa « delo montante », soman, lœ plus zoli kane bonbon, lœ plus zoli kane mapou — ce kann i pète anflér sou la pointe kanif, ce kann ou la-pokor pèz dessi-là i largue son mièl dann out gozié — lœ plüs gayar kane i vo pa lœ plüs vilin pti kaniki kourpion volaïy pou aranze la boush, pou éklérsir lœ sang.

Axel Gauvin