Dann péi déor, bann savan la fine invante in sipèrvirus i tard pa paraliz tout zafèr, akomanssé ar bann transpor par bato épi par aviyon. L’ané 2020 l transpor par l’aviyon la diminyé 66% é transpor dann bato li ossi li la diminyé bonpé.Si tèlman ké bann péi épi bann réjyon konm nou, sar blizé baz dsi zot mèm talèr pou done demoun manzé. L’ané 2021 sar pa pli gayar ké l’ané 2020 si lé sho i kontinyé konmsa.

Astèr si lé possib, mi yèmré plézante in pé... si dir in n’afèr konmsa sé plézanté.Ala sak mwin néna pou di :dopi lontan bann trafikan la drog, pou évite tonm dann bra la poliss, la trouv bann méssaz kodé. Olèrk koz an mil é an san zot i koz an patate, loshou, manyok. Fransh vérité, sak zot I fé lé ziss bon pou fé trap azot pars la poliss i koné sak i vann bazar é sak i anvoye méssaz kodé. Alor, kan la poliss i vé li pé rafal banna.

Toultan ké sé bann trafikan k’i fé sa, lé possib sa la poin in gran konsékans dsi lotonomi alimantèr, mé i prétan bann politisien zot ossi i mèle azot la parti. I paré ! Mwin pèrsonèl mwin la pa vi, mé mwin la konm antandi.Kossa mwin la antandi ? Mwin la antann inn-dé politisien koronpi kissoi aktivman, kissoi passivman, i éshanj méssaz rantre zot dsi zot téléfone. Sa i done :

Mi liv aou troi patate, wi rann amwin dé. Mi liv aou maniok, fouyapin,kanbar épi toute in bann rasine mé sa i apèl rotour. Konm la poliss lé antréné é ké sa lé pli fasil pou konprann ké bann yéroglif ézipsien ébin zot lé riskab fé trap azot, mèm in pé lé fine trapé. Lo pozitif :sa i amenn anou droite dsi lotonomi alimantèr,.Lo négatif : sa i aranj pa lonèkté dann bann tranbzaksyon piblik.

Pardon éskiz, zot i koné mi yèm takiné é sa ossi I fé parti d’la vi. Takinaz é kassaz tiboi, sa lé dé mamèl léspri kréol kassèr lé kui.