Di sak na pou di

Alerte orange mésöman carton rouge !

Courrier des lecteurs de Témoignages / 19 zanvié 2018

JPEG - 17.3 ko

Dann post, nou té guingne antann moune té i rès lö sïd Larényon. Lèrk paké la plï i déboule an ravine dann shömin, zot té blizé partir travay : anrézon napwin alerte rouge, si zot i prézant pa lantröpriz, lé riskab zot zourné travay sar pa payé. Maire Sinzozèf, lï, lï koné la situasyon, lï di : pö la komïne Sinzozèf, amwin mi déklar alert rouz. Olyédsa, alï préfet, lï tortiy minm : « Lé pa larlèt rouz, söman lé konm si té larlèt rouz ».

Alor, parapor Sinni, soley i briy, anou, dann les Hauts, dann Sïd, ousak la briz i filosh, la plï i ravaz, i koné pa anou, nï ekzist pa. Monsieur le Préfet, mwin néna dë konsey donn aou : anpromyé, larlèt rouz, sa i désid par komïne, nonva inkou toute Larényon. Episa, Bois-Court, la Plaine-des-Cafres, néna « la villa du préfet » lontan, « la villa du département » koméla. Kaz-la, la toultan guingne son lïtilité : inkou, lèrk nou té i rèss Bois-Court, alalapa lélikoptèr i ronf dann syèl ; tèl zot i antann alï, mö dë ti marmay i vol shömin pö partir war.

Mon madam i kour deryèr sö bann tifiy : kisa èl i wa dsann lélikoptèr ? Sanm inn tantine, prézidan konsey général sötanla. Ou wa, kaz-la lé kab rannservis ! Aou-la, prömyé komandman dann protocole alerte orange : lö préfé i tak baro la préfecture, i sava rès Bois-Court ; fasonla, dann kër cyclone, out dë kanèt-lö-zyé i sa war kosa-i-lé cyclone pö moune lé-haut, ou sar kab prannpar zot situasyon. Mwin na pwin ladoutans : kinm soley i briy dössi la Préfecture Sinni, ou amiz arpa pö pèz sïl bouton Alerte rouge !

Manyèl