Lo spéssyalist listoir sé Johny Payet é lé z’ote néna shakinn son spéssyalité… La madam lé kandidate dann dézyèm circonscripssion mi panss èl lé éspéssyalizé dann la fasson manzé La Rényon épi lo rapor rante lo manzé épi lo kiltyèlé lo kiltirel.

Dann in déba la dépité sortante i domann aèl koman i sava fé avèk lo prozé RN dsi lo plan nassyonal pars lé ékri la kantine lékol nora arienk in méni avèk toute sak i fo pou fé in méni konplé donk nora in vyann é toulmoune i koné sé pou mète la vyann pork — bann zanfan mizilman i manz pa — épi néna bèf galman — bann zindouiste i manz pa.

Donk la dépité i domann son ladvèrsèr koman i sava fèr issi La Rényon é wala son réponss ; i pé pa tienbo konte toute partikilarité é sak i manz pa bèf konm sak i manz pa pork va manz lo ri, lo grin épi léguime. Mèm si lé prévi ké li nora in ropa konplé.

Sa la pa in possibilité sé in sèrtitide pars kan in RN lé mèr dann in komine sé sak li fé… In bon politissien nora gliss la dsi épi nora fé in réponss an fassonn d’évite réponn. Mé madam-la, in lanssyène instite èl i fonss dann mir karéman.

Sirman dann déba-la épi dann la suite mi panss èl la ramass in bonpé voi kan èl la réponn konmsa, mé sa i vé dir anou dsou kèl rézime intoléranss ni sava viv si RN i ranporte zélékssion. Sé pou sa mwin sré pour k’i done bann RN la parol lo pli souvan possib é zot parti va dsann pli vite ké li la monté.

A bon antandèr salu !

Justin