Isi la Rényion, nou néna in léspès kamaléon andémik, i apèl « l’Endormi » Kamaléon là, na lo partikilarité sanz koulèr kan li vé, solon landroi li lé. Bin, figuir à zot, li lé pa si andémik ké sa, pars nou koné dopi kèk zané déza, la Rényion i abrit in not léspès, in not kalité kamaléon, ki sanz koulèr parey, mé an fonksyion lo van. Lo van la politik. Zot la konpri ?

Initil rovnir dési tout’ zafèr avan, pousa i fodré in roman. Alon guèt in kou, zis sak i éspas zordi. Lé inkroyab war la fakilté inndé boug politik néna pou sanz koulèr, pou byin fé war zot par lo nouvo Présidan. Défilé, konférans èk la préss, voyaz Paris, mé pa sèlman. Tout’ lo bann astèr i ador Macron ék in lamour fou, son zoriantasyion pou la Rényion lé doss, zot tout’ lé éré ! Karbiran i gomant, la grèv partou, somaz i flamm, zot lé éré ! Lasirans èk mitiél, lo CSG i gomant, zot lé éré ! L siprim lalokasyion lozman, kontra édé, zot lé ankor éré ! Talèr lo kréol i sora kitouni anvèr, zot i sora éré mimm . Foutor, va !

Mé la pa ryink sa, antr lo bann komik, na kom in kompétisyion pou ariv promié. Kom konkour Miss, ou plito konkour Mistèr, pou war kisa domin va roprézant la Rényion. Sépa koman, Macron i sar débrouy son karkass, si kél kritèr li sa baz ali.

Dési lo Kapasité lo servèl ? Lo kapasité béz do zèf ? Kapasité abritir lo pép ? Ou alor si lo koulèr kravat, lo mark langouti i mét ? Ou ankor si néna in péktoro dinn ou in lestoma pintad ? Antouka si sé ladsi, mi koné déza kisa i sa rèt à tèr. Amwink, Makron i anbark lo paké. Mé, alor là nora in sakré problèm.

Parské isi la Rényion, nou lé pa an kampagn Normandie. Isi, i swingn pa kok do lo. Episa dann baskour kréol na in sèl kok i sant.

Pol