In pé, mi panss, va di i fo pa pran sa pou kozman rasis mé bann sinp kozman pou déstabiliz bann zouèr in lékip ou in n’ot. An touléka, mwin k’la antann dann mon vi in bonpé kozman mi apèl rasis, mi pé dir azot kozman konmsa téi fé pa plézir sak téi gingn sa pou zot kont kan zot l’apré fé zot éspor épi galman sak i aprésyé pa bien bann zirman konmsa.
Mé zot va dir amwin sa lété vré dann tan é lé moinss vré koméla sansa zot va di sa téi éspass dann foutbal amatèr, mé inn foi ké sé lo fout profésyonèl, i koz pi konmsa.
I koz pi konmsa ?
Konbien foi bann spéktatèr téi bate lo poin dsi léstoma an fézan bann kriyé zako ? In moun konm Thuram, konm Jodeph Antoine Bell, é konm d’ot gran zouèr lété viktime bann kassaz lé kui-la. Bell i rakont kan téi insilt ali, li té tousèl é son bann dalon zamé téi manifèst pa zot solidarité sansa pou tap in pé dann son do épi pou dir ali sa la pa grav.
Dopi dé-troi zané bann zinstans internasyonal la déside mète in kou d’aré dsi bann kozman rasis ziska sak la éspass mardi soir. Soir-la dann park dé prinss PSG téi zoué kont in lékip turk : lanbyans lété in pé éléktrik é téi komanss done karton ziska ké lo katriyèm arbite i apèl larbit santral pars li néna, d’apré sak li di, in problèm avèk lantrénèr adzoin lékip turk, in kamerouné é lo katriyèm arbit la di kékshoz konm li néna in problèm avèk lo noir.In zuè lékip turk la di ali :kan sé in blan wi apèl pa li in blan, akoz kan sé in noir wi apèl ali in noir ?Lo rasism anti noir sé sa.
Tout bann zouèr dann lé dé kan la domann kossa l’arivé épi zot la désid kite lo térin pou mète in kou d’aré avèk lo rasism dann foutball é lo match l’arété pars lo dé lékip téi vé pi oir lo larbite dsi lo bor térin ; lo match l’arété é li téi doi rokomanss mèrkrodi soir.
Mi koné pa si lo kou d’aré va vréman marshé, mé lé inportan ké dé zékip la min dan la min i désid arète in match par raport in kozman rasist.L’UEFA va ankété, kèl sanksyon nou va oir.Mé lé sir ké si bann zouèr bann gran zékip é si bann spéktatèr zot ossi i déside fé arète léskandal rasist, néna dé shanns k’i marsh.
Alor, in éspor san rasism ?Mi souète vréman sa i ariv. Issi, épi partou oussa bann sportif I done azot a fon pou zot éspor é pouf é plézir bann spéktatèr. Mi souète galman in sosyété san rasism mé nou lé ankor loin.

Georges Gauvin