Na poin tro lontan d’sa, néna lo dirizan in parti politik an Frans, la v’ni bat’ in karé la Rénion, koté Sinpir. Li la koz, dann zournal, dann radio, dann télé, pou di, li yèm pa zirouèt. La pa bézoin fé in désin pou konprann kosa boug là, la vouli dir, épi sirtou kisa li té ki viz. Mé moin lé sir, zoréy in bon pé, la guign koud’siflèt.

Pétèt néna inndé an parmi nou, la pik in raz, akoz kin boug i sort’ déor, i vyin koz komsa isi, kom pou fé konprann, la Rénion, néna ryink sa mimm, zirouèt. Ek kozman komsa, lévré, lo syin i boir pa d’lo ! La ont’ i mont’ si out figuir. Mé moin mimm, pou mon par, mi donn pa li tor.

Parské kan mi zèt in rogar dann rétrovisèr la politik, mi wa so kalité la, partou. Moin lé anvid dir, sé mimm pi d’zirouét ké nou néna la Rénion, sé d’ zéoliénn, si télman in bann i tourn zot palto, léspas in batman d’zié, sak briz zéléksion. Mi oz pa donn a zot lo non, lo bann boug èk lo bann madam là, si télman lo liss lé gran, mon tèt lé riskab bloké.

Dakor, zirouèt la politik néna détroi in pé partou, sa nout tout’ i koné. In pié d’boi la pouss tort’, lé malizé ardress à li. Mé isi la Rénion, lé éspésial, sé lo sanpion. Sétin in not lespésifité lokal. Mon kamarad i di a moin, néna an parmi banna, lé profésionél pou do vré, komsi zot néna in patant’ pou sa. Mi koné pa si sé biro zéleksion la Préféktir Sin-Dni, ki déliv sa. In patant’ zirouét, zot imazine in pé ? Pou kan l’Asosiasion dé Zirouét la Rénion ?

Antouka, ki apél a zot zirouét ou zéoliénn, sé in léspés ki prolifèr kom mové zerb..ankor plis dopi bann dernié zéleksion. Sé in gro ménass, in gro danzé pou nout ti péi, pou son dévlopman.

Lo priorité, si ni vé avansé, sé trouv in bon moyin pou stop so varyiété anvayisant ki gangrinn la Rénion. Lo dirizan politik, péi la Frans, la di isi, ké li yèm pa zirouét , li pé dor trankil. Akoz mi kroi ké li lé pa tousèl. Mi koné mimm in bon pé d’moun disi, la di sa, avan li.

Pol