In démi-nouvél rout litoral ! Kan moin la tandi sa, moin la pèt à rir. Mé aprè, moin la di, non. Lé tro sérié pou gaskoné. Mi koné lontan, té i di, à nou démi-fransé, sa oui. Lontan ankor, boutik sinoi té ki vann désik par démi-liv, ou in démi-liv la grès, ou ankor in démi-kar lo rom. Si ou té inpé raté, an grandèr, out kamarad pou anmérdé, té apèl a ou, démi-porsion. Tousala lé vré , mé in démi-nouvèl rout litoral, koman banna la fé pou invant sa ? Akoz pa osi astèr apèl Didié Rober, in démi-prézidan d’Rézion ? I soré normal.

Mé parlfèt, i fodra osi, dési lo rout là, ni roul dann in démi-loto ! Bondié Sénir, ryink la Rénion nana d’zafèr komsa. Mé mon kamarad i di à moin, pangar sa boug Sintandré là, la fé in gri-gri pou rann Didié Robèr son moné. Moin mi kroi pa sa. Antouka, ni dékouv la, in not léspéfisité la Rénion ! I fodra grav a li dann marb, kom lo lamandman Virapoulé.

Mé dann tousa, pétè i f opa alé pli vit ké la misik osi, kom lavé di in zour, Pir Moroi. Moin lé pa pli fité kin not, mé moin la pa pli koulou, nonpli. Lé riskab i fé in gran larlik, pou casièt à nou kamayang.

Pol